Noticias corporativas

Santiago, 30.04.2024.-    No marco da Semana Mundial da Inmunización de Nacións Unidas, a CRTVG está a desenvolver unha nova #AcciónG de Responsabilidade Social Corporativa, cunha campaña de concienciación arredor da importancia da vacinación para protexer a sociedade, nenos e maiores, de enfermidades que se poden previr.

A Televisión de Galicia está a emitir estes días unha peza divulgativa na súa programación. A campaña céntrase no slogan #AíndaQueNonOVexas, que incide na protección silenciosa e invisible que supoñen as vacinas para a nosa saúde, e que tamén se pode ver no portal web. 

Esta #AcciónG dos medios públicos apoia o labor divulgador da ONU das medidas colectivas necesarias para protexer a persoas das enfermidades que preveñen as vacinas en todo o mundo. Ademais, a Organización Mundial da Saúde está a colaborar cos seus asociados para axudar os países a retomar o camiño que lles permita protexer máis persoas contra enfermidades neste ano en que se celebran os 50 anos do Programa Esencial en Inmunización (EPI, en inglés).

Programas informativos da TVG e a Radio Galega colaboran coa campaña emitindo contidos relacionados. Entre outros contidos, nos seus Telexornais, no espazo radiofónico ‘Convivir’ ou no magazine matinal ‘A Revista’ que xa recibiu a coordinadora de UNICEF Galicia, Irene Marín, para explicar o labor de UNICEF neste eido. 

A CRTVG é socia do Pacto Mundial das Nacións Unidas e encadra as súas accións de Responsabilidade Social Corporativa no marco dos Obxectivos de Desenvolvemento Sostible (ODS) de Nacións Unidas.

Esta nova acción persegue tamén apoiar e difundir os Obxectivos de Desenvolvemento Sostible número 3, Saúde e benestar, e número 10, de Redución das Desigualdades. As #AcciónsG son as campañas de RSC da CRTVG para actuar, para provocar o cambio e lograr unha sociedade mellor e máis responsable.

Santiago, 25.04.2024.-   O primeiro Estudo Xeral de Medios deste 2024 marca de novo  o extraordinario liderado nas audiencias da Televisión de Galicia. Os datos do Estudo Xeral de Medios (EXM), publicado este xoves, sinalan a canle galega como a máis vista de Galicia, cun 21% de cota de luns a venres e 20,6% no conxunto da semana.

TVG é líder con 6,4 puntos máis, de luns a venres, que o seguinte competidor, Antena 3, e a 8,3 da outra canle pública que emite en Galicia (TVE, 12,7%).

A franxa do mediodía consolida o liderado informativo 

No tempo da información do mediodía (entre as 13:00 e as 17:00 h), e especialmente co bloque conformado polo ‘Galicia Noticias’ e ‘Telexornal Mediodía’, a TVG acada o 34,9% de cota de pantalla, mentres o seguinte competidor, Antena 3, sitúase nunha cota do 16,7%. A seguinte canle pública, TVE, conta cunha media neste tempo de emisión do 12,5%.  

E na franxa de noite (entre 20:00 e as 04:00 h), a TVG acada tamén o liderado en Galicia, cunha cota do 19,2%, a 6,6 puntos de distancia do competidor máis próximo (Antena 3, cunha cota do 12,6%). Por días da semana, o Estudo Xeral de Medios salienta as cotas de pantalla acadadas pola TVG os martes cun 23,4%, luns cun 22,6% e dos xoves e domingos cun 22,4%.

Líder tamén das canles autonómicas os sete días da semana

Entre as televisións autonómicas reunidas na FORTA, a Televisión de Galicia é tamén a máis vista tanto de luns a venres como de luns a domingo, e supera en máis de tres puntos as seguintes canles máis vistas da federación de organismos autonómicos. 

A Radio Galega segue a ser a emisora pública máis escoitada de Galicia

A última onda do EXM reflicte de novo a clara posición da Radio Galega como emisora pública máis escoitada de Galicia, duplicando amplamente os rexistros da outra emisora pública do país, RNE. No acumulado anual (abril 2023-marzo 2024), a Radio Galega logra unha media de 158.000 oíntes diarios de luns a venres e 140.000 oíntes diarios de luns a domingo. Estas cifras supoñen un incremento de 1.000 novos oíntes no conxunto da semana e de 8.000 novos oíntes no período de luns a venres con respecto ao ano móbil anterior. En termos porcentuais, supón un incremento de audiencia dun ano a outro dun 5,33% de luns a venres.

Nese mesmo período acumulado anual, entre abril de 2023 e marzo de 2024, o total do conxunto de emisoras da Corporación logra unha media de 180.000 oíntes diarios de luns a venres e de 164.000 oíntes diarios de luns a domingo; significando un incremento do 7,14% e do 3,8%, respectivamente, con 12.000 e 6.000 oíntes máis en cada caso con respecto do ano móbil anterior.

Así, destaca o crecemento de Radio Galega Música, que chega ata os 24.000 oíntes diarios no conxunto da semana, cun incremento do 29,41% de luns a venres e do 26,32% de luns a domingo, cunha media de 5.000 novos oíntes diarios máis desde hai un ano.

Santiago, 22.04.2024.-    A plataforma dixital AGalega estrea este martes os dous primeiros capítulos da serie documental ‘Curando o mundo’, un programa en que o cirurxián coruñés Diego González Rivas, que está a revolucionar a cirurxía torácica, percorre o mundo ensinando a súa técnica minimamente invasiva para operacións de pulmón.

González Rivas é o creador da técnica UniportalVATSeRats, coa que operou xa máis de 7.000 pacientes en 129 países. En cada lugar que visita, os espectadores poderán adentrarse en como xestiona o choque cultural, o tratamento da morte e da esperanza ou as condicións de vida. 

Os seis capítulos de ‘Curando o mundo’ están ambientados en Sierra Leoa, Liberia, A China, Romanía, Kuwait, Bosnia, Portugal e España. AGalega terá dispoñible a serie desde o 23 de abril, cando se estrearán os dous primeiros episodios, e cada martes sumarase un novo.

A primeira entrega desenvólvese en Kuwait. O doutor González Rivas chega a este país do Golfo Pérsico o mesmo día que morre o emir de Kuwait, Nauaf ao Ahmed ao Sabá. O país está de loito oficial durante 3 días. Poderá operar con normalidade os pacientes que están agardando por el? No segundo, o cirurxián emprende unha misión médica en dous dos países máis pobres do mundo, Serra Leoa e Liberia, onde pasará un auténtico calvario para poder sacar adiante as cirurxías.

Santiago, 18.04.2024.-    A serie da TVG ‘Motel Valkirias’ recibiu en Nova York o Premio Prata dos New York Festivals TV & Film Awards, na categoría de programa de entretemento/drama. Este premio norteamericano de cine e televisión recoñece a creatividade de producións audiovisuais de todo o mundo e vén sumarse á traxectoria de éxito da produción galego-portuguesa, que actualmente está dispoñible na nova plataforma dixital da CRTVG, AGalega.

‘Motel Valkirias’, que en 2023 xa se alzara con outro premio internacional, o Premio CIRCOM da asociación das televisións rexionais europeas, no apartado de entretemento e ficción, está preseleccionada este ano no Premios iberoamericanos Platino, onde compite na categoría de mellor miniserie ou teleserie e na de mellor interpretación feminina pola actuación da actriz portuguesa Marina Mota. Estes galardóns coñeceranse o sábado, 20 de maio. Ademais, a ficción foi preseleccionada na categoría de mellor fotografía nos Premios Sophia 2024 ou Premios Anuais da Academia Portuguesa de Cinema, os galardóns máis importantes do audiovisual portugués, que se entregarán o 26 de maio.

‘Motel Valkirias’ é unha ficción galego-portuguesa, producida por CTV e SPi, que contou coa participación da TVG e a RTP, a televisión pública portuguesa, e que se estreou en marzo de 2023 en HBO España e na Televisión de Galicia. A serie, de 8 capítulos, está ambientada nun espazo singular, un motel fronteirizo, un lugar estancado no tempo, esquecido das comunicacións e do progreso. Neste marco sitúase a trama da serie, en que, a modo de dramedy, se abordan temas como a presión social sobre as mulleres ou a precariedade económica á que están expostas.

A dirección de ‘Motel Valkirias’ corre a cargo de Álex Sampayo e Jorge Queiroga, e conta cun equipo de guionistas de ampla traxectoria encabezado por Ghaleb Jaber Martínez e Raquel Arias. A serie está protagonizada por María Mera, o gañador dun Goya Chechu Salgado e as actrices portuguesas Marina Mota e Maria João Bastos.

Santiago, 11.04.2024.-    A CRTVG segue a estreitar liñas de traballo co audiovisual portugués. Este mércores tivo lugar en Lisboa a preeestrea de ‘Revolução sem sangue’, a primeira longametraxe do director Rui Pedro Sousa e coprodución luso-galega que chega esta semana aos cines de Portugal e será emitida, proximamente, pola Televisión de Galicia. ‘Revolução sem sangue’ está inspirada en feitos reais acontecidos durante a revolución portuguesa do 25 de abril de 1974 e documenta desde a ficción un momento crucial na historia política e social non só de Portugal, senón tamén na nosa propia.

En representación da Corporación, á gala asistiron Fernando Ojea, director de Contidos da CRTVG, e Montse Besada, xefa de Contidos da canle, nunha cita que reuniu unha gran representación do sector audiovisual de Portugal, co que os medios públicos galegos manteñen unha colaboración asentada e crecente, tanto no eido institucional como no da produción de contidos.

Trátase dun proxecto da galega Producións A Fonsagrada en coprodución con Station Ware, que se enmarca na liña de colaboración coa RTP. Conta ademais co apoio do ICA portugués e a distribución de Filmax e mais a portuguesa Cinemundo.

O filme posúe unha forte carga emocional e humana, e pretende homenaxear os mortos da revolución a través dunha viaxe de descuberta en que os espectadores se farán conscientes da importancia deste momento clave na historia do país veciño.

Televisión de Galicia anunciou en xaneiro deste 2024 o seu apoio a este proxecto cinematográfico nunha resolución da súa Comisión Directiva de Avaliación de Proxectos de Apoio á Produción Cinematográfica, dando cumprimento á resolución da Dirección Xeral da Corporación relativa á presentación de proxectos audiovisuais de interese, no marco do coñecido como apoio do 6 %. 

Apoio ao cine e á coprodución de contidos con Portugal

A CRTVG mantén un apoio sostido a proxectos cinematográficos en galego e propicia a súa competitividade non só a escala nacional, senón tamén no mercado internacional. Este investimento en cultura, e particularmente no cine e a promoción da lingua e a ficción galega, é un labor continuo que se plasma en convocatorias anuais de proxectos, na participación directa nas producións ou ben na adquisición de dereitos. Favorécese así o sostemento dun sector audiovisual en Galicia en que a Corporación desenvolve un papel clave desde os seus inicios.

A colaboración coa RTP e o apoio a coproducións dos dous países veciños é unha constante e como resultado deste labor pódense citar títulos de producións como ‘Auga Seca’, ‘O corpo aberto’, ‘Motel Valkirias’, ‘Vidago Palace’ ou o documental ‘Galegos d’Ouro’, entre outras destes últimos anos, ademais de programas de entretemento como as distintas edicións de ‘Aquí Portugal’.

Santiago, 09.04.2024.-    O Teatro Principal de Ourense acolle este mércores 10 de abril a preestrea da película ‘+Cuñados’, que chegará aos cines o vindeiro día 19. Esta produción de Portocabo, que conta coa participación de Televisión de Galicia, ademais de RTVE e Movistar+, a Deputación de Ourense, a Denominación de Orixe Ribeiro e a Xunta de Galicia, dálle continuidade á exitosa comedia ‘Cuñados’, a maior estrea na historia do cinema en galego ata o momento.

O acto contará coa presenza do elenco e do equipo da película, e de autoridades das institucións implicadas na súa produción, como o conselleiro de Cultura, Román Rodríguez; o director xeral de Cultura, Anxo Lorenzo; o director de AGADIC, Jacobo Sutil; o presidente da Deputación de Ourense, Luís Menor; o asesor de Cultura da Deputación, Aurelio Gómez, e a vicepresidenta da D. O. Ribeiro, Concepción Iglesias. Por parte da CRTVG asistirán o director de Proxección Social, Xaime Arias; a subdirectora de Contidos, Rosa Sierra, e a xefa de Programas, Vanessa Grela. 

O filme, rodado en galego, conta de novo con algunhas das caras máis recoñecidas do panorama audiovisual: Xosé A. Touriñán, Miguel de Lira, Federico Pérez, Eva Fernández, María Vázquez, Iolanda Muíños e Mela Casal. A eles sumaranse, entre outros, os actores David Perdomo, Ivo Bastos, Ana Saltão e Nuno Sá. Nesta secuela de ‘Cuñados’, dirixida por Luís Avilés, a acción sitúase dous anos despois do acontecido na primeira película. 

Esta nova aventura dos cuñados arranca coa aparición dun cadáver xusto no medio da ponte internacional de Tui. A provincia de Ourense volve ser o escenario principal e a zona do Ribeiro tamén ten unha especial presenza nos acontecementos que se desenvolven na película. En ‘+Cuñados’, os espectadores poderán percorrer xunto aos protagonistas as rúas da cidade preparadas para acoller a festa máis agardada do ano: o Entroido. 

Apoio ao cine galego

A CRTVG mantén un apoio sostido a proxectos cinematográficos en galego e propicia a súa competitividade non só a escala nacional, senón tamén no mercado internacional. Este investimento en cultura, e particularmente no cine e na promoción da lingua e a ficción galega, é un labor continuo que se plasma en convocatorias anuais de proxectos audiovisuais no marco do coñecido como apoio do 6 %, na participación directa nas producións ou ben na adquisición de dereitos. Favorécese así o sostemento dun sector audiovisual en Galicia no que a Corporación desenvolve un papel clave desde os seus inicios.

Santiago, 24.03.2024.-  A gala dos Premios Mestre Mateo do Cluster do Audiovisual celebrada este sábado na Coruña e que foi retransmitida pola canle pública entregou ata 17 galardóns a actrices, actores, presentadores e producións de entretemento e ficción apoiadas pola Televisión de Galicia.

A presentadora do espazo da TVG ‘Malicia noticias’, Lucía Veiga, alzouse co premio á mellor comunicadora, categoría na que tamén eran finalistas Juan Fuentes do ‘Quen anda aí’ e Paco Lodeiro por ‘Atrápame se podes’. E o espazo do prime time da TVG ‘Cos pés na terra’ gañou o Mestre Mateo a mellor programa de televisión. Xosé Ramón Gayoso foi o elixido para entregar o Premio de Honra Fernando Rey do Cluster, por toda a súa traxectoria, á xornalista Eva Veiga, quen fora unha das primeiras presentadoras daTVG, en 1985.

Apoio ao cine galego

A película ‘O corno’ foi a gran gañadora da noite con sete premios, entre eles os de mellor película, guión e dirección para a cineasta Jaione Camborda. A cinta estaba nominada en 14 categorías e xa gañara a Concha de Oro en San Sebastián mentres que a súa protagonista, Janet Novás, foi a mellor actriz revelación nos premios Goya deste 2024.

‘Matria’ foi outra das longametraxes vencedoras con cinco premios: mellor actriz protagonista para María Vázquez e mellores interpretacións de reparto para Susana Sampedro e Santi Prego. Tamén acadou os Mestre Mateo á dirección de fotografía e á dirección de produción.

O actor Tamar Novas alzouse por segundo ano consecutivo como mellor actor protagonista, nesta ocasión por ‘¡Salta!’, longametraxe tamén apoiada pola canle pública galega.

‘Os espazos en branco’, no que colabora o ente público, impúxose na categoría de mellor documental. E na categoría de mellor realización o premiado foi ‘O Gran Camiño. Grandes Rutas a Pé do Mundo’, participado tamén pola TVG.

Santiago, 07.03.2024.-    A CRTVG conseguiu 14 candidaturas aos Premios Celtic Media Festival, que se entregarán o vindeiro mes de xuño en Cardiff, a capital de Gales, no transcurso da 45ª edición deste prestixioso certame. 12 producións co selo da canle pública (a película ‘O Corno’ é candidata en dúas categorías) e a Radio Galega, nomeada a ‘Estación de radio do ano’, competirán polos galardóns con propostas de canles como a BBC británica en Escocia, Gales e Irlanda do Norte, as irlandesas RTE e TG4 e France 3 Bretagne.

Na categoría de animación foi nomeada ‘O soño da sultá’, unha fábula dirixida por Isabel Herguera e producida por Abano Producións, que está inspirada nun conto feminista indio, escrito en 1905 por Rokeya Hossain. Esta coprodución internacional, con factura galega, foi primeiro filme animado europeo en competir na sección oficial de San Sebastián e acumula galardóns a nivel nacional e internacional, incluíndo o premio á mellor longametraxe de animación que acaba de conseguir no Festival de Bruxelas.

No apartado de ‘factual entertainment’ (entretemento baseado en feitos reais) competirán dúas producións da TVG: ‘Galicia Bonita’ e ‘Unha historia de crimes’. En emisión desde o ano 2019, ‘Galicia Bonita’ é un reality producido por Lúa Ideas en que unha arquitecta especializada na recuperación de contornas rurais percorre Galicia cun reto enorme: reformar en cinco días unha casa que represente un bo exemplo do feísmo que, por desgraza, segue sendo habitual na paisaxe galega. Pola súa parte, ‘Unha historia de crimes’, de Ficción Producciones, analiza, coa axuda de expertos, os delitos con maior impacto na opinión pública galega a través de testemuñas familiares, documentación gráfica, atestados policiais e mesmo gravacións dos xuízos.

Ao premio a mellor serie dramática optará ‘Operación Marea Negra’, realizada tamén por Ficción Producciones. A Televisión de Galicia emitiu en 2023 a segunda temporada deste thriller inspirado polo suceso dun narcosubmarino que chegou hai uns anos ás costas galegas.

Outra das producións candidatas, neste caso na categoría de artes, será ‘María Casares, a muller que viviu mil vidas’, un documental sobre a actriz galega universal producido por Agallas Films e dirixido por Xavier Villaverde. A peza, que a G2 emitiu esta mesma semana, dentro da programación especial arredor do 8M, achégase á vida dunha unha muller extraordinaria que se acabou convertendo en Francia nunha das actrices máis aclamadas do cine e do teatro.

A película ‘O Corno’, dirixida por Jaione Camborda e gañadora da Cuncha de Ouro no último Festival de San Sebastián, foi nomeada en dúas categorías: mellor película dramática e ‘spirit of the festival’, que recoñece as producións que mellor simbolizan o espirito do certame. Este drama rural, ambientado na Galicia dos anos 70, está protagonizado por Janet Novás e narra a historia dunha mariscadora e tamén parteira que, tras un terrible suceso, se ve obrigada a fuxir a través dunha ruta de contrabandistas.

Na categoría de mellor documental competirá ‘Galegos D’Ouro’, realizado por Farol de Ideas e dirixido por Arminda Sousa, que se centra no gran número de traballadores galegos que contribuíron a construír a paisaxe do viño das ribeiras do Douro desde o século XVIII, incluíndo a construción dos socalcos, das adegas, das prantacións e das vendimas, ata facer del o escenario que hoxe é Patrimonio Mundial da Humanidade.  

Completan o extenso abano de candidaturas da CRTVG os programas ‘Comisión de Festas’, que dá a coñecer o inxente traballo de organización das festas galegas, seleccionado na categoría de ‘factual series’; ‘O mellor tractor do mundo’, emitido o ano pasado nas redes sociais dos medios públicos cun formato de concurso, nomeado no apartado ‘short form’ (formato curto); ‘Pim Pam experimenta’, un concurso escolar de ciencia, con preguntas, experimentos e retos, que opta a ser galardoado como mellor programa infantil; ‘Coa luz do corazón’, en que os espectadores coñecen a realidade das persoas cegas, nomeado no apartado de documental de deportes, e ‘Ondas Novas’, que analiza como se pode innovar na creación musical, tanto na composición como na interpretación, e que é candidato a mellor espazo de música.

Ademais destas producións da Televisión de Galicia, a Radio Galega será unha das emisoras que compita polo premio a mellor estación de radio do ano.

O Celtic Media Festival, que promove a cultura e linguas dos países celtas nos ámbitos do cinema, a televisión, a radio e os novos medios de comunicación, ten lugar desde hai 45 anos de forma rotatoria entre Irlanda, Escocia, Gales, Illa de Man, Cornualles e a Bretaña francesa. Trátase dunha cita obrigada para poñer en valor os produtos audiovisuais galegos na contorna internacional e nel a Corporación establece sinerxías con televisións internacionais europeas, que posibilitan, entre outras cousas, acordos de cesión de contidos e proxectos comúns.

Santiago, 05.03.2024-    A CRTVG celebrou este martes en Santiago a gala de presentación da serie de humor ‘Ghuasapp’, que chegará ao prime time da TVG o vindeiro domingo ás 22:30 h, coa estrea dos dous primeiros capítulos.

Ao acto, celebrado no Auditorio Abanca, asistiron moitas caras coñecidas da canle e todo o elenco desta comedia sobre a familia Freire, que vive espallada pero en contacto permanente a través dun grupo familiar de ‘ghuasapp’. A gala estivo conducida polo presentador Ricardo Saavedra e nela interviu o director de Contidos da CRTVG, Fernando R. Ojea.

Protagonizada por Mercedes Castro, Evaristo Calvo, Xoel Fernández, Fernando Tato e María Mera, esta comedia de enredo é nunha produción da Televisión de Galicia e CTV Media. A serie alzouse como un dos contidos máis vistos na plataforma AGalega, en que foi estreada estreada en exclusiva antes do seu salto á grella da TVG.

‘Ghuasapp’ desenvolve as peripecias de Carme, unha muller brava galega, e máis Lolo, un lobo de mar xubilado, que formaron unha familia hai unha chea de anos. Tantos, que agora os seus tres fillos xa son maiores e independentes. Sindo, o máis vello, é empresario, está divorciado e ten unha filla adolescente. Beni, o do medio, é un músico vocacional, pero gaña a vida cun taxi. E Rosa, a benxamina, meteuse a influencer e por aí busca o seu futuro da man de John, o seu marido, un médico co que vive en Londres.

Santiago, 05.03.2023.-    Catro producións apoiadas pola CRTVG participan no Festival de Cine Málaga, un dos encontros máis importantes da industria cinematográfica española, que se celebra ata o 10 de marzo na capital da Costa do Sol. Compiten na Sección Oficial, optando á Biznaga de Ouro, dúas cintas, ‘As Neves’ e ‘Tratamos demasiado ben as mulleres’, mentres que ‘Aurora’ e ‘Salvaxe, salvaxe’ foron seleccionadas na categoría de longametraxes documentais.

Dirixida por Sonia Méndez, ‘As Neves’ desenvólvese nunha vila galega de montaña onde todos se coñecen. A noite de Entroido un grupo de adolescentes celebra unha festa e dróganse con cogomelos. Ao día seguinte espertan cun temporal de neve e coa noticia de que Paula, unha das rapazas da festa, desapareceu. A vila queda incomunicada e cada vez é máis urxente atopala. Iníciase unha investigación que causará un fondo cambio nas súas vidas e na súa relación co mundo.

Con Carmen Machi e Antonio de la Torre como protagonistas e baixo a dirección de Clara Bilbao, ‘Tratamos demasiado ben as mulleres’ é unha comedia negra ambientada nos anos 40 do século pasado. A historia ten como protagonista a Remedios Buendía, que defende a súa patria e loitará por ela por enriba de todo. Un fatídico día de outono de 1945, un grupo de maquis á fuga ten a mala idea de tomar a estafeta onde Remedios, ilusionada, proba a o seu vestido de noiva.

‘Aurora’, dirixida pola realizadora viguesa Area Erina, é un traballo cinematográfico rodado durante máis de 10 anos que se centra na vida dunha muller rural galega e ofrece unha ollada íntima e auténtica. A través da vida desta muller, explóranse temas universais como a familia, o traballo, a violencia de xénero, a adversidade e a resiliencia.

En ‘Salvaxe, salvaxe’, a cámara de Emilio Fonseca adéntrase nos montes galego-portugueses rastrexando imaxes e ausencias do lobo ibérico. Este ensaio fílmico atravesa unha historia relacional cargada de sometemento e exterminio e enfróntase a unha historia audiovisual feita de imaxes-simulacro do natural salvaxe.

Apoio ao cine galego

A CRTVG mantén un apoio sostido a proxectos cinematográficos en galego e propicia a súa competitividade non só a escala nacional, senón tamén no mercado internacional. Este investimento en cultura, e particularmente no cine e a promoción da lingua e a ficción galega, é un labor continuo que se plasma en convocatorias anuais de proxectos audiovisuais no marco do coñecido como apoio do 6 %, na participación directa nas producións ou ben na adquisición de dereitos. Favorécese así o sostemento dun sector audiovisual en Galicia no que a Corporación desenvolve un papel clave desde os seus inicios.

Santiago, 04.03.2024.-    O filme ‘O soño da sultá’, participado pola TVG, acadou esta fin de semana o premio á mellor longametraxe de animación na 43ª edición de Anima, o Festival Internacional de Animación de Bruxelas, que se celebrou do 23 de febreiro ao 3 de marzo na capital belga.

A cinta, que tamén competiu na última edición do Festival Internacional de Cine San Sebastián, contou desde o seu lanzamento co recoñecemento da crítica e xa leva recollidos varios galardóns. Ademais de ser a primeira longametraxe de animación europea en participar na sección oficial en San Sebastián, logrou o Premio Irizar ao cine vasco e mais o Premio da Asociación Vasca de Guionistas Euskal Gidoigileen Elkartea, outorgado a Isabel Herguera, directora e guionista da produción, e o seu coguionista, Gianmarco Serra. A nivel internacional acadou o Premio Mellor Coprodución internacional no Festival de Hamburgo e tamén obtivo candidaturas aos premios máis destacados a nivel nacional: os Goya, os Forqué e os Feroz.

‘O soño da sultá’ é unha fabula producida pola empresa galega Abano Producións, que, ademais, contou con dúas animadoras galegas no equipo de traballo. Está inspirada nun conto feminista indio, escrito en 1905 por Rokeya Hossain. A versión de Isabel Herguera conta a historia de Inés, unha directora de animación española que se atopa en Ahmedabad para romper co seu amante indio. Entra nunha librería e sorpréndese ao atoparse cunha novela ambientada nun país imaxinario gobernado por mulleres. Abraiada pola historia e a actitude transgresora da autora, anímase a facer un filme.

A película participada pola TVG é unha coprodución internacional con Alemaña, que contou tamén co apoio de ETB, o Goberno vasco e o ICAA, e coa axuda de Media Creative Europa e da distribución de Filmin. Estreouse o pasado 17 de novembro nesta plataforma e, cun percorrido de máis de 20 festivais nacionais e internacionais, posúe o distintivo ‘Especialmente recomendada para o fomento da igualdade de xénero’.

Santiago, 01.03.2024.-  Televisión de Galicia leva 17 meses seguidos instalada nos dous díxitos. Cun 10 % de media e un 10,2 % na franxa máis vista do día, o prime time, TVG seguiu a ser en febreiro a opción elixida polos galegos para informarse e entreterse, e segue a ser a canle pública máis vista en Galicia pese ás potentes retransmisións deportivas en aberto que existían na oferta audiovisual de febreiro. É de destacar tamén a programación da G2, que chegou neste segundo mes do ano ao 1 %, sendo unha das segundas canles máis vistas da FORTA.

Febreiro foi o mes tamén da cobertura da campaña electoral e a xornada do 18F, en que a TVG fixo unha gran despregadura técnica e humana para achegar toda a actualidade política. Preto do 30 % (29,3 %) da poboación galega de 4 e máis anos formou parte do ‘Especial Eleccións 18F’, con 771.000 contactos. De feito, a programación ‘Eleccións 18F’ da TVG foi o produto audiovisual que chegou a un maior número de persoas, de calquera medio e soporte, que se puidese ver en Galicia.

Referencia informativa

Os espazos informativos da Televisión de Galicia seguen a ser os máis vistos, e acadaron unha audiencia total de 1.652.000 telespectadores no mes, o que significa un 62,7 % dos galegos de 4 e máis anos. Por días da semana, destacan as cotas de pantalla con medias superiores ás acadadas no mes: luns (10,2 %), mércores (10,4 %), xoves (10,4 %) e venres (10,8 %). No prime time cómpre salientar as cotas acadadas nos luns (10,2 %), xoves (10,9 %), venres (11 %) e domingos (11,5 %).

Por outra parte, a TVG segue a ser un mes máis unha das canles motor da rede de televisións autonómicas de FORTA, superando a este grupo en 1,7 puntos de cota.  

AGalega, a nova plataforma dixital da CRTVG, creada en xaneiro, rexistrou un crecemento tanto en contidos como en rexistros. Con accesos rexistrados desde 125 países distintos e máis de medio millón de sesión abertas desde a posta en marcha da OTT dos medios públicos galegos, AGalega e as apps Xabarín e AGalegaAudio seguen a consolidarse como a gran plataforma de contidos, moitos exclusivos, en lingua galega aberta ao mundo.

Santiago, 23.02.2024.-    A plataforma dixital AGalegaAudio estrea este venres, da man da artista María José Pérez Ferreira, máis coñecida como MJ Pérez, o podcast ‘De lá para cá’, que lles achega a cultura musical de Portugal aos usuarios da CRTVG. O espazo é xa accesible na plataforma dixital e tamén en Radio Galega Música (sábados ás 22:00 h.).

Na primeira entrega, MJ Pérez presenta a evolución musical da cantante Ana Moura, e ‘Afro Fado’, o último de Slow J, álbum que bateu récords no seu lanzamento. MJ lembrará a Sara Tavares e falará con Budiño, que colaborou con ela no seu disco ‘Zume de Terra’. No segundo capítulo da vindeira semana, o podcast percorrerá algúns dos discos e proxectos destacados do ano 2023: Carminho, Milhanas, Expresso Trastlântico, Ana Lua Caiano, Conjunto Corona, Salvador Sobral, ou Eu.Clides outros.

‘De lá para cá’ (60’) traerá a música portuguesa actual e mergullarase tamén no seu panorama dos últimos tempos. Mainstream e música independente, proxectos consolidados ou colaboracións entre artistas, e tamén fado e música tradicional terán espazo na proposta que atende así mesmo a relación co cine, explicando, por exemplo, a importancia da música lusa no filme en lingua galega ‘O corno’, de Jaione Camborda.

O podcast representa un paso máis da CRTVG no achegamento á cultura e a lingua lusas e súmase a outras propostas de entretemento e ficción xa estreadas que estreitan lazos co país veciño.
    
María José Pérez Ferreira, máis coñecida como MJ Pérez (o seu nome artístico), é a creadora e condutora de ‘De lá para cá’. Natural de Arzúa, destaca polas súas raíces lusas e coñecemento do país veciño. Se ben é máis coñecida entre o público polo seu proxecto musical, ademais de ser cantautora e estar vinculada ao mundo da música, MJ é tamén produtora audiovisual e comunicadora.

Primeiro mes da plataforma dixital: AGalegaAudio ten xa máis de 4.000 contidos

O 17 de xaneiro naceu para o gran público a plataforma dixital AGalega, acompañada das app AGalegaAudio e Xabarín. No seu primeiro mes de vida, AGalegaAudio contou con 70.000 sesións abertas e dispón actualmente de máis de 4.000 contidos de audio.

Actualmente, a AGalega pode accederse vía web (www.agalega.gal), e ademais pode descargarse desde Google Play e Apple Store. A recomendación é empregar sempre a última actualización, xa que nesta fase de lanzamento as melloras de usabilidade son diarias. No que respecta ás smart tv, pode accederse a través de 4 opcións: descargando a app directamente en televisores LG e no Chromecast con Google TV; enviando o sinal desde un teléfono Iphone tanto ao Chromecast como directamente aos televisores intelixentes que conten con tecnoloxía Air Play, como os Samsung; enviando o sinal desde un dispositivo Android (tablet ou telefóno) á smart tv a través do duplicador de pantalla; e finalmente, enviando o sinal á smart tv directamente desde o navegador de  www.agalega.gal. Proximamente as apps estarán tamén dispoñibles para a descarga directa noutros televisores intelixentes e en Fire TV.

Santiago, 19.02.2024.-    O ‘Especial Eleccións 18F’ da TVG emitido este domingo desde o novo Estudio 300 de San Marcos acadou un 21,8 % de cota de audiencia. Foron máis de cinco horas de programa en directo, en que os espectadores puideron vivir o peche dos colexios electorais, coñecer a enquisa de GAD3 para TVG -que reflectiu con exactitude os resultados finais-, seguir o escrutinio minuto a minuto, coñecer análises da situación desde diferentes puntos de vista a través dos faladoiros e tamén as reaccións dos líderes políticos ao longo de toda a noite electoral.

Os xornalistas Marta Darriba e Carlos Amado estiveron á fronte deste programa especial, que se serviu da tecnoloxía do novo Estudio 300 para ofrecer un despregue gráfico apoiado en elementos de animación 3D e realidade aumentada que axudaron a clarificar o seguimento da información. En total, o número de contactos dos programas ‘Eleccións 18F’ do domingo ascendeu a 767.000 galegos de 4 e máis anos. No conxunto da xornada, o número de contactos foi de 908.000 persoas.

A TVG liderou toda a xornada despregando unha cobertura informativa nas catro provincias, nos colexios electorais, nas sedes dos partidos e no centro de datos de Santiago, coa programación de ‘Adiantos informativos’ pola mañá e pola tarde, e co programa ‘Especial Eleccións 18F’, de máis de cinco horas de directo, durante o reconto. A cota media do día da TVG foi do 13 %, superando o dato de audiencia dos comicios de 2020.
    
Líder entre as canles autonómicas

Entre o conxunto das canles autonómicas reunidas na FORTA, a TVG liderou de novo as audiencias na xornada. A cota do 13 % de TVG en Galicia superou en 5 puntos a media das canles autonómicas (7,9 %). No prime time, cun 22,1 %, a TVG seguiu liderando amplamente e duplicando en audiencia a outra canle pública con programación electoral en Galicia, La1 de RTVE, que acadou un 10,1 % na faixa máis vista do día.

Todos os medios da Corporación, TVG, Radio Galega e canles dixitais, entregáronse no seguimento dunha xornada con equipos e conexións cos distintos focos de interese. O portal informativo G24.gal recolleu en tempo real as novidades da xornada e incorporou un widget interactivo para explorar todas as posibilidades e resultados. E, por vez primeira, unha noite electoral puido seguirse tamén a través da nova plataforma global da CRTVG, agalega.gal.

Santiago, 16.02.2024.-  O 17 de xaneiro naceu para o gran público a plataforma dixital  AGalega, que viña acompañada das apps AGalegaAudio e Xabarín. Neste primeiro mes de vida, AGalega rexistrou 396.000 sesións repartidas en 125 países distintos. Tras España, que conta coa meirande parte deste rexistro, en segundo lugar sitúanse os Estados Unidos, con case 6.000 sesións. Terceiro posto para Suíza, con máis de 5.000, e, en cuarto lugar, o Reino Unido, con 4.700. Por riba das 2.000 sitúanse Alemaña, Francia, A Arxentina, e logo seguen destacados Portugal, O Brasil, Holanda, México e O Canadá, todos eles por riba das mil sesións. Completan esta lista de 125 países algúns tan dispares como Seychelles, Togo ou Uzbekistán.

Pola súa banda, AGalegaAudio contou con 70.000 sesións abertas neste período, e Xabarín con máis de 47.000. En total, máis de medio millón de sesións desde a posta en marcha da OTT dos medios públicos galegos.

Os contidos exclusivos son os máis vistos

O humor triunfa en AGalega: o máis visto son as estreas das comedias nativas dixitais ‘Na Gloria’ e ‘Ghuasapp’, que se poden ver en exclusiva na plataforma. A estas comedias seguen as longametraxes ‘Jacinto’, ‘Cuñados’ e ‘O que arde’. AGalega naceu con dúas apps integradas, Xabarín e AGalegaAudio, que tamén se poden descargar de forma individual.

En AGalegaAudio atopamos toda a programación da Radio Galega, 53 podcasts e contidos nativos exclusivos. O máis escoitado nestes primeiros 30 días de vida é: o podcast de ‘Pensando en ti’, os contidos deportivos de ‘Ao Contraataque’, con Pedro Pablo Alonso, e o podcast de Cristina García, ‘Superando a ficción’.
    
Na App Xabarín, para os máis cativos, os contidos máis vistos foron as películas gañadoras do Goya ‘Valentina' e ‘A galiña Turuleca’.

Dispositivos móbiles e televisores intelixentes

Actualmente, a AGalega pode accederse vía web (www.agalega.gal), e tamén pode descargarse desde Google Play e Apple Store. A recomendación é empregar sempre a última actualización, xa que nesta fase de lanzamento as melloras de usabilidade son diarias.

No que respecta ás smart tv, pode accederse a través de 4 opcións: descargando a app directamente en televisores LG e no Chromecast con Google TV; enviando o sinal desde un teléfono Iphone tanto ao Chromecast como directamente aos televisores intelixentes que conten con tecnoloxía Air Play, como os Samsung; enviando o sinal desde un dispositivo Android (tablet ou telefóno) ao smart tv a través do duplicador de pantalla; e finalmente, enviando o sinal ao smart tv directamente desde o navegador de  www.agalega.gal. Proximamente as apps estarán tamén dispoñibles para a descarga directa noutros televisores intelixentes e en Fire TV.

Ao igual que outras plataformas como Netflix ou Amazon Prime, os contidos de AGalega van rotando e non están dispoñibles todos ao mesmo tempo, na procura dun servizo atractivo para o usuario, que pode rexistrarse para gozar das funcionalidades personalizadas e os avisos de contidos exclusivos da plataforma.

En total, AGalega incorpora a día de hoxe máis de 2.000 contidos audiovisuais que están a disposición da audiencia, a demanda, e cun abano de títulos que abarca desde as series e programas míticos da TVG ata espazos nativos dixitais desenvolvidos exclusivamente para a plataforma. En total, sumando as tres novas canles de comunicación, son máis de 9.000 os contidos subidos á AGalega, AGalegaAudio e Xabarín.

Este proxecto de plataforma OTT (over-the-top) marca un fito na culminación do proceso de dixitalización da Corporación, que se viu completado coa estrea do novo estudio 300 de Informativos. Na actual contorna internacional, coa data da fin das emisións en TDT prevista para 2030, a CRTVG culmina a súa transición ao eido dixital e abre o tempo do consumo á demanda, en aberto, dos contidos en lingua galega para todo o mundo.

Santiago, 07.02.2024.-    Hoxe preséntase en Culleredo, onde se está a rodar estas semanas, a nova serie da CRTVG: ‘Na Gloria’, unha comedia dirixida ao público familiar que proximamente se converterá na primeira grande estrea de ficción, e en exclusiva, de AGalega, a nova plataforma OTT da CRTVG.

A serie preséntase este mércores ás 19:00 h no pazo de Vilaboa de Culleredo, coa presenza do elenco da serie, protagonizada pola actriz galega Cristina Castaño, o intérprete andaluz Dani Rovira, Xosé Antonio Touriñán, David Perdomo e Lucía Veiga.

‘Na Gloria’ é un proxecto orixinal de Andrés Mahía, Xosé Castro e Xosé Antonio Touriñán, coa produción de Tex45 e Undodez. A trama desenvólvense na imaxinaria A Gloria, unha pequena localidade ao pé do Camiño Francés onde unha executiva en crise existencial (Cristina Castaño) decide darlle un cambio radical á súa vida e converter a casa dos seus avós nun hotel para peregrinos. Para levar a cabo o seu soño contará coa axuda do seu mellor amigo, un chef vegano de fama internacional (Dani Rovira). A chegada dos dous chocará coa vida da aldea, en que a protagonista viviu os felices veráns da infancia, pero onde agora vai atopar todo tipo de situacións de estrés.

Esta comedia de 15 capítulos, dirixida ao público familiar, retrata o choque de dous mundos: o dos 'urbanitas', que idealizan as bondades do campo, e o dos ‘ruralitas’, que soñan coas oportunidades que lles foron negadas.

Santiago, 06.02.2024.-  O debate electoral organizado pola Corporación de Radio e Televisión de Galicia CRTVG, este luns 5 de febreiro, acadou unha gran resposta de audiencia cun 18% de cota de pantalla, sendo o máis visto dos últimos tres comicios autonómicos (2016, 15,3%; e 2020, 15,8%).

A programación especial da TVG, con máis de 5 horas de directo, incluíu a chegada dos candidatos, dous faladoiros, e a audiencia tamén puido ver os momentos previos e posteriores ao debate cos candidatos e asesores dentro do plató. O debate estivo moderado polos xornalistas Marta Darriba, redactora xefa, e Alejandro López, subdirector da Área de Información e Documentación da CRTVG.

A cita reuniu os candidatos -Alfonso Rueda, polo PPdeG; Ana Pontón, polo BNG; José Ramón Gómez Besteiro, polo PSdeG; Marta Lois, por Sumar Galicia; e Isabel Faraldo, de Podemos Galicia- nun evento que foi a primeira retransmisión da Televisión de Galicia desde o seu novo plató 300, a nova casa dos informativos da Televisión de Galicia que inauguraba as súas emisións con esta retransmisión.

Máis innovación
Á marxe da estrea do novo plató, a CRTVG emitiu un debate electoral por primeira vez a través da súa nova plataforma de contidos dixitais: ‘AGalega’. A través da plataforma puido verse o sinal do debate e simultaneamente o debate accesible en lingua de signos. Amais de na nova plataforma, o evento puido ser seguido a través de todas as canles convencionais da TVG e da Radio Galega, que contou tamén con programación especial ao redor da cita electoral.

Santiago, 02.02.2024.-    A CRTVG organiza e emite o vindeiro luns 5 de febreiro o  debate electoral para os comicios autonómicos do 18F entre as cinco formacións políticas que teñen en Galicia carácter de ‘grupo representativo’ ou de ‘grupo político significativo’ segundo a Xunta Electoral de Galicia.

O debate celebrarase a partir das 21:30 h e poderase seguir a través da Televisión de Galicia, a Radio Galega, a G2 -con intérprete de lingua de signos- e tamén a través dos medios dixitais da Corporación. Será a primeira retransmisión que vai facer a CRTVG desde o seu renovado Estudio 300 de Informativos. Estará moderado polos xornalistas Marta Darriba e Alejandro López, redactora xefa e subdirector da Área de Información e Documentación da CRTVG, respectivamente.

Os candidatos -Alfonso Rueda, polo PPdeG; Ana Pontón, polo BNG; Xosé Ramón Gómez Besteiro, polo PSdeG; Marta Lois, por Sumar Galicia, e Isabel Faraldo, de Podemos Galicia- poderán confrontar as súas posicións sobre asuntos de máximo interese para a cidadanía, distribuídos en tres bloques temáticos: un primeiro sobre políticas económicas e orzamentarias, en que se falará de emprego, industria e transición ecolóxica; un segundo sobre políticas sociais e financiamento do benestar, que inclúe educación, sanidade, igualdade e lingua, e un terceiro de modelo institucional para falar de pactos, gobernabilidade e a voz de Galicia no Estado.

Estrea do novo estudio 300 e ampla cobertura

Co gallo do debate, a CRTVG ofrecerá unha programación especial cun ‘Especial Informativo’ na TVG desde as 19:45 h, presentado por Marcos Sueiro e no que se contará con catro analistas que irán debullando os instantes previos e que tamén intervirán no espazo de reflexión posterior ao debate (23:30 h). Son Ana Luísa Bouza, licenciada en Ciencias Políticas e Socioloxía; María Bastida, profesora da Facultade de Ciencias Económicas e Empresariais da Universidade de Santiago; Xosé Luís Gómez, xornalista e editor de Mundiario, e Roberto L. Blanco Valdés, catedrático de Dereito Constitucional. Tamén a Radio Galega ofrecerá este debate con espazos de análise antes e despois do mesmo.

Para esta ampla cobertura, a CRTVG despregará un amplo dispositivo de recursos humanos e técnicos para garantir a calidade e pluralidade que require un debate electoral de máximo nivel, que se realizará desde o remodelado Estudio 300 da Televisión de Galicia. A CRTVG facilitará tamén o sinal para a súa difusión gratuíta e material gráfico do evento a todos os medios.

Tanto a fórmula para a asignación de tempos a cada formación no Plan de cobertura da CRTVG, como o carácter de ‘representativo’ ou ‘significativo’ dos diferentes grupos veñen establecidos pola Lei Orgánica de Réxime Electoral (LOREG) e as instrucións da Xunta Electoral de Galicia.

Santiago de Compostela, 26.01.2024.- Televisión de Galicia vai participar en nove novos proxectos cinematográficos, sete deles películas e dous documentais, segundo resolveu este venres a Comisión Directiva de Avaliación de Proxectos de Apoio á Produción Cinematográfica da CRTVG, dando cumprimento á resolución da Dirección Xeral da Corporación RTVG do 4 de abril de 2022 relativa ao procedemento de presentación de proxectos de producións audiovisuais de interese, no marco do coñecido como apoio do 9 %. Son sete novos proxectos cinematográficos e dúas longametraxes documentais, unha delas un documental de creación.

Entre as longametraxes cinematográficas atópanse cinco producións de identidade galega e con claro carácter autoral: ‘As augas’, producida por Maruxiña Film Comany, ópera prima da actriz Ledicia Sola, que presenta un drama intimista a partir dunha vivencia persoal; ‘Petróleo’, producida por Zuzú Cinema, que nace dun novo talento emerxente do noso cinema, Álvaro Pulpeiro, e que se pode definir como un wéstern moderno; ‘Onte á noite conquistei Tebas’, un novo proxecto de Filmika Galaika que significará o debut cinematográfico de Gabriel Azorín e que une relatos en épocas distantes nun lugar común: as termas de Bande; ‘Monstro’, cine fantástico dirixido por Andrés Goteira no que o protagonista transita mundos misteriosos; e ‘Tralovento’, unha proposta artística dirixida por Eloy López Serén que ofrece un retrato íntimo nunha aldea rural.

As outras dúas longametraxes teñen outros compoñentes: ‘Revolución sen sangue’ é un proxecto de Producións A Fonsagrada que documenta desde a ficción un momento crucial na historia política e social non só de Portugal, senón tamén na nosa propia; e ‘Leo & Lou’, unha película aberta e amable con rodaxe íntegra en Galicia que ten como ambición chegar ao gran público.

 En relación ás longametraxes documentais, a selección prevé dous proxectos de corte diferenciado: un documental producido por Miramemira que aborda a vida e repercusión social dunha icona da cultura popular e musical galega, ‘Ana e máis nós’, pero coa singularidade de que o foco se centra na relación da artista Ana Kiro e o seu público; o outro proxecto, ‘Prefiro Condenarme’, é un documental creativo que conta a historia real dunha muller maltratada desde a perspectiva da cineasta Margarita Ledo que utiliza os lugares e as imaxes de arquivo como ferramentas para que aflore a memoria.

Toda a información atópase no Portal de Transparencia da CRTVG.  

Nas súas seleccións, a Comisión Directiva de Avaliación de Proxectos de Apoio á Produción Cinematográfica da CRTVG baséase en criterios como:

- Favorecer a tarefa común de creación e sostemento dun sector audiovisual en Galicia que busque tamén unha mellora da sociedade, mesmo no aparentemente máis simple cometido do tempo libre e de lecer.
- Apoiar na creación audiovisual unha identidade propia como un proceso aberto onde a Corporación participe en proxectos de promoción e ampliación de produtos feitos polo sector da creación cinematográfica e como servizo que promova a garantía da continuidade dos sinais identitarios da Comunidade.
- Participar en proxectos que destaquen pola súa creatividade, calidade, viabilidade e con capacidade de repercusión na sociedade, polos medios tradicionais ou a través da súa presenza mediática nas redes sociais.
- Facer un esforzo adicional no investimento en proxectos presentados do ámbito cinematográfico, que inclúe a Lei 13/2022, do 7 de xullo, de paso que se contribúe a financiar películas e documentais, ben participando directamente na súa produción ou ben mediante a adquisición de dereitos, de acordo co Real Decreto 988/2015 do 30 de outubro.
- Ademais da calidade e viabilidade, préstase atención ao valor artístico e ao vencellamento coas realidades social e cultural galegas.
- Téñense en conta, asemade, os recursos humanos, biografías dos autores e historia das produtoras. De igual xeito, valóranse os recursos económicos implicados, así como as gravacións en territorio galego.
 

Santiago, 22.01.2024.-   A Corporación Radio e Televisión de Galicia ofrece un debate entre as cinco formacións máis representativas da comunidade, seguindo os criterios marcados pola Xunta Electoral. A el están convidados os candidatos e candidatas do Partido Popular de Galicia, Bloque Nacionalista Galego, Partido Socialista de Galicia, Sumar Galicia e Podemos Galicia.

O debate, tal como xa fora anunciado pola propia Corporación, celebrarase o día 5 de febreiro ás 21:30 h no renovado estudio 300 de San Marcos. Estará moderado polos xornalistas Marta Darriba e Alejandro López, redactora xefa e subdirector da Área de Información e Documentación da CRTVG, respectivamente.

Os candidatos confrontarán argumentos en base a tres bloques temáticos, que se estruturarán nas seguintes áreas:
    1. Políticas económicas e orzamentarias. Emprego, industria e transición ecolóxica.
    2. Políticas sociais e financiamento do benestar. Fiscalidade, educación, sanidade, igualdade e lingua.
    3. Modelo institucional, pactos, gobernabilidade e voz de Galicia no Estado.

Grupos políticos representativos e significativos

Ao debate están convidadas cinco formacións, tres en calidade de forzas representativas e dúas en calidade de grupos políticos significativos, segundo os criterios da Xunta Electoral. As tres formacións representativas son PPdeG, BNG e PSdeG, por ser as que lograron representación nos últimos comicios equivalentes: nas eleccións autonómicas de 2020 obtiveron 42, 19 e 14 deputados, respectivamente.

A Corporación tamén convida a este debate os grupos políticos que actualmente cumpren cos criterios para seren considerados significativos. Un grupo político significativo é aquel que, malia non obter representación nos últimos comicios equivalentes (neste caso, as eleccións autonómicas de 2020), si obtivo unha porcentaxe significativa de voto en Galicia (máis do 5%) en comicios posteriores.

Os dous grupos políticos significativos confirmados pola Xunta Electoral son as coalicións Sumar Galicia e Podemos Galicia. Ambas contan con esta consideración por ter integrado unha mesma coalición nas eleccións xerais do 23 de xullo de 2023, que obtivo o 10,92% do voto válido no ámbito da Comunidade Autónoma de Galicia. Nun escrito do 20 de xaneiro, a Xunta Electoral confirma que ambas coalicións deben ter a consideración de grupo político significativo a efectos de cobertura dos medios públicos no ámbito galego. Ningunha outra formación fóra das citadas logrou máis dun 5% do voto en Galicia en ningún dos comicios posteriores ás últimas eleccións autonómicas.