Televisión de Galicia procura o percebe perfecto en 'Bicos e bicas'

Santiago, 30.8.2025.-   ‘Bicos e bicas’ (22:00 h) busca na entrega deste sábado o percebe preferido de Galicia. Diferentes comarcas galegas defenderán o produto autóctono. A Costa Ártabra e as Rías Altas estarán representadas por Cedeira; o percebe do Roncudo e a Costa da Morte, por Corme (Ponteceso); o de Arousa e as Illas Atlánticas, por Aguiño (Ribeira), e o da costa sur de Galicia, por Baiona. Ademais, varios rostros populares da TVG, os presentadores María Mera, Diego Viaño, Paco Lodeiro e Terio Carrera, terán que superar un reto no programa: distinguir un percebe galego dun de fóra de Galicia.

O espazo amosaralle á audiencia as características das contornas percebeiras. Por exemplo, o percebe de Cedeira crece en augas particularmente frías; o do Roncudo é, probablemente, o máis famoso de Galicia debido á festa que veñen celebrando en Corme desde 1992; o de Baiona e A Guarda é un percebe cunha cor máis escura e ten un sabor moi intenso, e o de Aguiño procede, en boa medida, dun parque nacional, xa que boa parte das capturas se realizan na illa de Sálvora.

Para o veredicto final sobre o mellor percebe, o programa contará cos datos dunha macroenquisa, en que se responderon cuestións fundamentais sobre o crustáceo: é mellor comelo quente, tépedo ou frío? Cal é o tamaño perfecto? É o percebe o rei do marisco? Gusta a todo o mundo con independencia do poder adquisitivo? 

Ademais, María Mera, Diego Viaño, Paco Lodeiro e Terio Carrera terán que catar o produto para dar a súa opinión. E, entre os expertos do programa desta noite, estarán Agustín Vázquez, especialista en turismo, e Carlos Parra, ‘guisandeiro’ do castelo de Maceda. Poñerán a música King África, que exercerá tamén de catador, Xurxo Fernandes e as Pandeireteiras sen Fronteiras.