A CSAG presenta en Pontevedra a serie documental 'Camiño ao podio', dispoñible en AGalega.gal

Santiago, 03.07.2026.-    A CSAG presentou este xoves no Centro Galego de Tecnificación Deportiva de Pontevedra a serie documental ‘Camiño ao podio’, unha produción de cinco episodios que segue o día a día de dez promesas do deporte galego que se forman neste centro.

Coincidindo coa súa chegada á plataforma AGalega.gal, onde desde hoxe se poden ver todas as entregas, o salón de actos do CGTD acolleu a presentación oficial da serie, coa participación de María Sabucedo, en representación da Corporación de Servizos Audiovisuais de Galicia; Suso López, director do CGTD; e Damián Varela e Manuel Darriba, produtores e directores da serie.

A produción, realizada por Miramemira, foi un dos proxectos seleccionados na convocatoria de contidos dixitais de AGalega.gal e foi gravada ao longo do primeiro semestre de 2026 nas instalacións do centro e noutros espazos vinculados ao adestramento dos deportistas.

‘Camiño ao podio’ amosa o esforzo, a disciplina e os soños de cinco rapazas e cinco rapaces chamados a converterse na futura elite deportiva galega, ao tempo que ofrece unha visión do funcionamento do centro nos ámbitos deportivo, académico, residencial, sanitario e nutricional.

Ademais de en AGalega.gal, ‘Camiño ao podio’ pode verse na primeira canle da Televisión de Galicia, onde se emite os sábados e os domingos á sobremesa, arredor das 15:25 h.