'El Camping’ de Telemadrid, Premio Pello Sarasola de FORTA ao mellor programa autonómico 2025

Santiago, 12 de marzo de 2026. – O espazo ‘El Camping’ de Telemadrid foi distinguido co Premio Pello Sarasola ao Mellor Programa Autonómico 2025, un galardón que outorga a Federación de Organismos de Radio e Televisión Autonómicas (FORTA) para recoñecer os contidos máis destacados das televisións públicas autonómicas. A entrega do premio celebrouse en Toledo, no marco das xornadas de FORTA que este ano acolle Castilla-La Mancha Media con motivo do seu 25 aniversario.

         ‘El Camping’ é un programa semanal de telerrealidade, divulgativo e de entretemento dirixido a todos os públicos. Presentado por Elena Furiase e protagonizado por seis persoas con síndrome de Down, mostra a convivencia durante 10 días de todos eles nun cámping que debe ser renovado tras o verán, afrontando distintos retos laborais e persoais. Un formato que, tal e como definiu o director de Contidos de Telemadrid, Miguel Sánchez Canales, “deu visibilidade a persoas con capacidades diferentes”, no que se transmiten valores como o esforzo, a inclusión e a diversidade.

         A XI edición do Premio Pello Sarasola, creado en homenaxe ao profesional de gran prestixio da radiotelevisión vasca, forma parte das xornadas que organiza FORTA e ten como finalidade promover e recoñecer a produción propia das televisións públicas autonómicas en diferentes xéneros e formatos, desde concursos e series ata musicais. O galardón distingue aqueles formatos que poñen de manifesto valores como a proximidade e a identidade territorial.

         Do 11 ao 13 de marzo, Castilla-La Mancha Media exerce como anfitrioa dun encontro que reúne en Toledo distintos representantes das televisións autonómicas que conforman FORTA, nunhas xornadas de traballo orientadas á análise dos principais retos que afronta o sector audiovisual e ao reforzo da colaboración entre as cadeas.

         A cita coincide coa celebración do 25 aniversario de CMM, unha efeméride especial arredor da cal o ente público está impulsando diferentes accións ao longo do ano. Foi o secretario xeral de FORTA, Fernando Ojea, quen deu a benvida ás persoas asistentes ás xornadas que constitúen un espazo propicio para o intercambio de ideas, iniciativas e experiencias entre as televisións públicas autonómicas, así como para afondar en novas formas de colaboración para seguir estreitando vínculos e fortalecer o papel do servizo público nas diferentes comunidades autónomas integrantes.