'A Superfesta' vive a festa de San Roque por toda Galicia - CSAG
'A Superfesta' vive a festa de San Roque por toda Galicia
Os espectadores asistirán esta noite ao lanzamento do Globo de Betanzos, á Romaría de San Roque de Vigo, ás verbenas de Melide, ás Danzas Tradicionais do Hío, á Festa da Auga de Vilagarcía, á Festa do Ovo Frito de Cervo, e a sardiñada de Viveiro
Santiago, 20.8.2025.- Os dous Mozos de Arousa volven este mércores cunha nova aventura en ‘A Superfesta’ (22:20 horas). Nesta ocasión Bruno e Borjamina puntuarán as festas de San Roque de toda Galicia coa axuda das reporteiras. Que nota lle porán os mozos ao San Roque? Saberase ao final do programa.
Esta noite os presentadores, Bruno e Borjamina, presentan ‘A Superfesta’ desde a Festa de San Roque de Betanzos. Aí avaliarán as tradicións, a troula e a gastronomía dunha das grandes citas festeiras do ano. Tamén terán a oportunidade de vivir en primeira persoa o lanzamento do famoso Globo de Betanzos, bailar na verbena e, como non, probar a tortilla típica deste concello coruñés.
As reporteiras do programa, Adela Bértolo, Jose Torres e Laura Vecino, pola súa parte, estarán presentes noutras celebracións galegas do San Roque. Visitarán a tradicional Romaría de San Roque de Vigo, as verbenas de Melide, as Danzas Tradicionais do Hío, en Cangas, a impresionante Festa da Auga de Vilagarcía, a Festa do Ovo Frito de Cervo, e a gran sardiñada do concello de Viveiro.
Ao final do programa, Bruno e Borjamina puntuarán estes festexos do San Roque. E cando remate a temporada o público votará pola súa favorita a través das redes sociais do programa. A suma de votos e puntuacións serán fundamentais para saber cal é ‘A Superfesta’ do verán.