Celta-Vilarreal e Leganés-Deportivo, partidos da xornada no ‘Galicia en goles’ - CSAG
Celta-Vilarreal e Leganés-Deportivo, partidos da xornada no ‘Galicia en goles’
Comeza a Primeira RFEF, coa participación de seis equipos galegos
Santiago, 28.8.2025.- A programación da fin de semana na Radio Galega e AGalegaAudio.gal comeza na noite do venres, ás dez, coa primeira edición do ‘Galicia en goles’. Os oíntes terán un amplo resumo do partido que abre a temporada de Primeira RFEF entre o Real Madrid Castilla e o Club Deportivo Lugo, logo de que o encontro fora televisado pola G2 e por AGalega.gal. O amigable de baloncesto entre o Basquet Coruña e o Obradoiro será outro dos puntos de interese durante os sesenta minutos de programa.
O sábado, ás dúas e cuarto da tarde, chegará o adianto da xornada e a partir das catro Roberto Carlos Carballo conducirá as retransmisións do Pontevedra-Cacereño e Zamora-Celta Fortuna, correspondentes á Primeira RFEF, xunto ao Deportivo da Coruña-Levante Badalona, no comezo da Primeira División feminina.
O domingo, a edición informativa das dúas e cuarto da tarde resumirá o sucedido na Malata entre o Rácing de Ferrol e o Talavera, na Primeira RFEF, xunto ao amigable de baloncesto entre o Breogán e o Porto, previsto no pavillón de Viveiro. Ás catro comezará a sesión de tarde, con Balaídos como punto de referencia para acoller o Celta-Vilarreal. De novo, os seareiros olívicos gozarán dun enfrontamento entre protagonistas europeos e, por riba, o visitante desta volta é un participante da Champions.
Durante a tarde, os oíntes terán información do que suceda noutras citas futbolísticas das Primeira RFEF, como o Arenas-Arenteiro e o Ourense C. F.-Athlétic de Bilbao B. A final da Supercopa Galicia entre o Negreira e o Cultural Areas completará a axenda deportiva deste último día do mes de agosto.
A Radio Galega, que o luns día 1 de setembro estrea programación, ten reservada para a quenda da noite unha edición especial de ‘Galicia en goles’ coa retransmisión desde Butarque do enfrontamento entre o Leganés, recentemente descendido da Primeira, e un candidato ao ascenso, o Deportivo da Coruña. Tras sumar catro puntos nas dúas primeiras xornadas, o equipo de Antonio Hidalgo visita un rival que só puido lograr dous empates no treito inicial da temporada.