A TVG estrea este domingo ‘Divino tesouro’, un retrato da mocidade galega que racha estereotipos

Santiago, 22.2.2026.-  A TVG estrea este domingo, ás 20:25 horas, ‘Divino tesouro’, un novo formato que pon o foco na mocidade máis brillante de Galicia. O programa amosa historias de superación e talento de mozos e mozas de entre 16 e 26 anos que, malia estar iniciando o seu camiño profesional e vital, xa son referentes nos seus ámbitos. Os protagonistas son campións, influencers, investigadores ou emprendedores que, con traballo, entusiasmo e perseveranza, rachan cos tópicos asociados á xuventude.

No primeiro programa coñecerase a Julia Benedetti, ‘skater’ que fixo historia ao converterse na primeira española en participar nuns Xogos Olímpicos na modalidade de monopatinaxe, e o deseñador de moda Manuel Escurís, que pode presumir de vestir as Tanxugueiras na súa primeira xira internacional. Dúas historias de talento novo que exemplifican o espírito de ‘Divino tesouro’.