Co obxectivo de coñecer de preto o marisqueo da ostra, Adrián viaxará hoxe a Barallobre, en Ferrol, onde, da man de Virginia e Miriam, se converterá en todo un experto nesta arte. Terá que dobrar o lombo se quere levar unhas ostras para o aperitivo á altura dos comensais.
Para completar un menú que comezará con ostras ao natural e sen perder de vista os sabores do mar, Benigno Campos pensará nesta ocasión nun peixe barato e saboroso que nunca pasou polo programa, o melgacho, un deses peixes feos á vista, pero moi agradecidos na cociña. O cociñeiro sábeo ben e por iso proporá un xantar con este produto como protagonista: guiso de melgacho.
Pero isto non será todo, xa que os “Larpeiros” completarán esta auténtica homenaxe aos produtos do mar cunha sopa de peixe que preparará Leni xunto á cociñeira convidada Celia Cabrera.