Benigno, que as sabe todas, tamén é moi amigo dos mexillóns. Considera que son un tesouro da cociña galega, o ouro negro das nosas rías. Por iso esta semana propón para o xantar fideos negros con mexillóns. A sobremesa, coma sempre, será cousa de Merchi e Leni, que prepararán petisús de crema.

Decidido o menú, chega para Adrián a hora de poñerse en marcha. O “larpeiro” máis itinerante irá voando ata A Illa de Arousa, onde o estará agardando Angélica, que lle dará todas as claves para converterse en todo un experto en mexillóns. Terá que subir á batea e traballar no barco como un mariñeiro máis se quere levarlles aos seus compañeiros uns mexillóns á altura da ocasión.