Horacio decidiu abandonar Louredo. Enviará o bispo un substituto á parroquia? Esta é unha das preocupacións dos veciños, aínda que o alcalde ten outra maior: Se Horacio decide non regresar e se borra do padrón, Louredo perderá a súa condición de concello e terá que anexionarse a Ferráns, vila rival e orixe, en opinión dos louredáns, de todas as súas desgrazas.

Ademais, as clases de Maite convertéronse nun foco de insubordinación. As mulleres de Santo Antonio están moi desgustadas pola marcha de Horacio e culpan do sucedido a Delmiro. Moncha, nun ataque de orgullo familiar, protagonizará unha encarnizada pelexa con Puri.

Mentres, Horacio prepara a súa partida cara a unha apartada ermida, en busca da paz que necesita. Pero saír de Louredo non lle será tarefa sinxela pois, entre despedidas e homenaxes de última hora, a cousa pódese dilatar... O máis sorprendente será a homenaxe que lle preparará o alcalde; unha manobra para recuperar o favor dos seus votantes e que causará un verdadeiro impacto no delicado ánimo do sacerdote.