Din que o maior éxito dun compositor de música para gaita, é que as súas pezas pasen ao pobo e as adopte como propias. Diso pode estar ben orgulloso o gaiteiro que acompañaremos desta volta na Coruña: Antonio Mato.

Antonio Mato é un antigo gaiteiro de “Cántigas da Terra”. Dos históricos da formación e creador dos varios e populares “Pasodobre d’Os Mato”. Pasaremos con el e a súa familia un bo cacho escoitando as súas pezas e a súa longa historia como un dos gaiteiros máis coñecidos da historia da música tradicional na Coruña.