Fuco Reyes: "Quixen fotografar o efecto da mirada"

La mirada en suspenso é a nova mostra fotográfica de Fuco Reyes. Nas súas fotos os rostros materialízanse fantasmagóricos como unha imaxe latente da consciencia, unha identidade que se atopa ao límite entre a aparición e a desaparición.

Nese espazo xusto e delimitado entre o referente e o seu reflexo, xorde unha mirada que nos confronta coa nosa orfandade, coa perda inefable da imaxe mental que construímos sobre a nosa identidade e das regras da realidade en que nos manexamos no cotián.