“Sopa de Festa” continuará este luns ofrecéndolles aos espectadores da Televisión de Galicia verdadeiros luxos gastronómicos para os seus padais, visitando algunhas das festas con máis sona da comunidade. Na edición desta noite, o protagonista indiscutible será o pemento, un dos produtos que máis variedades ofrece e que ademais coincide co seu mellor momento de produción.

O equipo de “Sopa de Festa” achegaralles dúas exaltacións desta saborosa hortaliza que se celebraron ao longo desta fin de semana pasada. Por un lado, acudiron á provincia de Ourense onde celebraron a XXXV Festa do Pemento Arnoia e, por outro, as cámaras do programa tampouco quixeron perderse o festexo que tamén se viviu por terras coruñesas para exaltar aos “reis do tapeo galego” na XXXVI Festa do Pemento de Herbón.

Desde a vila do Ribeiro de Arnoia poderán ver como os veciños e visitantes gozaron coa degustación do pemento arnoiés. Uns prefiriron tomalos ao xeito máis traidicional como é fritido, outros en tortilla e os máis esixentes prefiriron o pemento recheo.  Pero o pemento de Arnoia pódese degustar de moitos xeitos diferentes, así o poderán comprobar coa receita que prepararán no restaurante do Hotel Balneario de Arnoia, un lugar para o descanso pero tamén para o bo comer.   

E de Ourense a Herbón. Se hai outra variedade de pementos que traspasa fronteiras son os de Herbón. O equipo de reporteiros de “Sopa de Festa” neste especial dedicado ao pemento non podía deixar de visitar esta parroquia de Padrón para comprobar en persoa se “Os pementos de Padrón uns pican e outros non”. 

Pero antes de probalos e compartir esta data cos veciños de Herbón, as cámaras do programa achegáronse ata un invernadoiro para falar cuns dos produtores da zona que lle explicarán como se cultiva esta variedade de pemento e sobre todo como distinguilos. 

Outros actos que rodean a esta tradicional festa de Herbón e que tamén recolleron as cámaras de “Sopa de Festa” son: o desfile de tractores engalanados para a ocasión; a ofrenda á pimenteira; o nomeamento de novos cabaleiros da Orde do pemento e a entrega de pementos de pementos de prata.