A gastronomía, o viño, a festa, a diversión e o bo comer dos galegos volverá quedar patente este luns na Televisión de Galicia cunha nova edición do programa “Sopa de Festa”. O equipo de reporteiros do programa achegará todo canto aconteceu na XLIII Festa do Viño Tinto do Salnés, que se desenvolveu ao longo da fin de semana en Ribadumia. 

“Sopa de Festa” volverá converterse nos ollos do espectador para que goce do espírito e o ambiente festeiro dunha das exaltacións vinícolas con máis sona de Galicia. Hoxe, un dos produtos estrela da comarca do Salnés, o viño de Barrantes, será o protagonista dunha festa que se celebra desde o ano 1967 en Ribadumia.

Ao longo do tempo do programa, os espectadores da TVG poderán ver como “Sopa de Festa” se mergullou no ambiente festivo acompañando a veciños, visitantes e organizadores desta festa e participando con eles en todos os actos programados para exaltar o produto da zona.