A banda coruñesa Triángulo de Amor Bizarro presentou este ano o seu disco “Salve Discordia” e hoxe un membro desta banda, Isa Cea, vén ao programa “Zigzag Diario” para presentar este traballo e para falar dos plans futuros dun grupo que está en pleno auxe. 
A continuación, o espazo cultural da tvG2 irá coa música cara a Pontevedra, xa que alí está Cora Sayers, que debuta na cidade do Lérez co seu novo disco, “I’m Home”.  No espazo de vídeos musicais, o programa trae hoxe unha estrea. Trátase da aposta de Forest & Dove, un grupo formado polo británico Richard J. Dowling e os músicos galegos Juanjo Casteleiro e Oscar Caramés. A posta de longo terá lugar na Coruña. 
Finalmente, nos “Fondos Reservados” de Moncho Lemos, farán unha lembranza do grupo Jefferson Airplane, xa que dous dos seus compoñentes, Paul Kanter e Signe Anderson, faleceron, curiosamente, o mesmo día.