Xente marabillosa entra de cheo no fenómeno dos fillos tiranos e na súa consecuencia máis preocupante, a violencia filioparental, unha realidade que non se debe ignorar, xa que cada ano miles de pais en España se ven obrigados a denunciar as agresións que sofren a mans dos seus propios fillos. Pero moitos máis permanecen en silencio, sen buscar axuda para atallar un problema que, na meirande parte dos casos, só pode empeorar.

Co fin de axudar a visibilizar este tipo de situacións, recréase cunha cámara oculta como unha rapaza vai con súa nai a unha tenda de deportes para mercar unhas zapatillas. A moza quere unhas que saen do presuposto, así que a nai proponlle unha alternativa semellante. Pero a rapaza non está de acordo e ponse agresiva... Conseguirá o seu obxectivo? Ou aparecerá alguén que lle poña freo?