Nesta nova entrega de 'Festigaliando' desprazámonos ata Bemposta para vibrar co ritmo do Ouren Sound Fest. Andrés Calamaro, Cariño, Shinova e The Rapants son os protagonistas da oitava edición do festival, que vén chea de música urbana que brilla con luz propia nos niveis autonómico e estatal.

O acontecemento converte un ano máis esta singular poboación ourensá, a antiga Cidade dos Muchachos, no epicentro de Galicia para un feixe de melómanos, polo que ademais de asistir aos concertos máis sobranceiros e entrevistar os artistas invitados, visitamos a contorna para saber que lles parece aos veciños esta gran celebración musical.