O noso reporteiro recadeiro Rafa Durán visitará en Cortegada, a Milucha, para recoller pementos de Arnoia. Este produto servirá para realizar a receita de hoxe, que fará o noso chef Xoanqui Ameixeiras cunha pequena axuda de Isabel, a súa veciña.

Ingredientes:

- Media ducia de pementos de Arnoia

- 5 patacas medianas

- 1 barra de pan

Para facer a brandada:

- 500 gr de lombo de bacallau desalgado

- 4 dentes de allo

- 1 cunca de aceite de oliva

- 1 cunco de leite

- 1 presa de olivas negras

- Un chisco de noz moscada

- Perexil fresco

Para a salsa de pementos de Arnoia:

- Media ducia de pementos de Arnoia

- 1 cebola moi picada

- 1 dente de allo

- 1 bote de leite evaporado

- Sal e pementa

Elaboración:

 Outro xeito de comer os pementos de Arnoia é enchelos de bacallau. Cocemos as patacas no microondas e reservamos. Para a salsa de pemento rustrimos a cebola e o allo, incorporamos o pemento, o leite evaporado e salpementamos.Pasamos polo brazo batedor e reservamos.

Para a brandada, aromatizamos unha cunca de aceite de oliva virxe con catro dentes de allo. Confeitamos o bacallau e reservamos este aceite. Emulsionamos o bacallau ben limpo de espiñas e peles, co aceite e leite morna. Mesturamos coa pataca cocida e machucada, coas olivas negras e co perexil.

Enchémolos pementos, cubrímolos coa salsa, e enfornámolos durante 20 minutos a 200 graos. Empratamos e listo para comer…!!!