Esta noite, os espectadores da Televisión de Galicia volven ter a oportunidade de ver unha nova entrega do programa “Sopa de Festa” na súa edición de outono. Nesta ocasión, o programa estará dedicado a un dos produtos estrela desta temporada: o cogomelo.

O equipo do programa botouse ao monte para recoller algunhas das variedades de fungos e cogomelos que se poden atopar nesta temporada nos montes galegos. Da man dun grupo de afeccionados ás setas e guiados por dous expertos micólogos, Antonio e Álvaro, explicaranlles aos espectadores da Televisión de Galicia algunhas das particularidades das setas encontradas.

Ademais de meterse de cheo en plena natureza, os reporteiros de “Sopa de Festa” tamén visitarán as instalacións dunha empresa galega que se dedica ao cultivo de setas ecolóxicas e ao desenvolvemento de diferentes liñas de investigación sobre as súas propiedades en materia de saúde e beleza.  

Doutro lado, ademais de coñecer o mundo dos cogomelos no seu hábitat natural, o obxectivo de “Sopa de Festa” tamén é mostrarlles como cociñalas. Nesta edición, a nosa colaboradora Churra desprazarase ata o restaurante Casa Solla para exercer de axudante de cociña de Jesús Crespo, xefe de cociña do establecemento, quen lle ensinará a receita dun saboroso prato con cogomelos. 

Ademais, a reporteira Inma Morandeira tamén se achegará ata a cociña dun restaurante das Pontes para preparar con Pepe os exemplares de setas que recolleu na súa saída ao monte.

Por último, e para non perder outra das esencias de “Sopa de Festa”, nesta edición tamén haberá celebración. Os veciños das Pontes celebraron durante a fin de semana unha Feira de Fungos e Setas, onde se desenvolveron varias actividades e as cámaras do programa tamén estiveron alí.