Este mércores visita o estudio de “ZigZag Diario” Nacho Dafonte, un dos integrantes do grupo de música electrónica Presumido, que forma xunto á Tarci Ávila e que acaba de presentar o seu traballo “Vendetta”. Os dous artistas iniciaron este novo proxecto despois de compartir traxectoria en bandas como Aerolíneas Federales ou Eladio y Los Seres Queridos. Na súa sección, Moncho Lemos comentará as memorias dun tolo polos vinilos desde a novidade editorial “En busca de los discos perdidos”, en que o xornalista estadounidense Eric Spitznagel conta o seu empeño en recuperar discos da súa xuventude que fora vendendo. Ademais, durante o programa, os espectadores poderán ver unha reportaxe sobre o grupo Trilitrate, que protagoniza o primeiro concerto do ciclo “Compostela Conversa” en que, antes das actuacións, os artistas convidados dialogan co público sobre diferentes temáticas. Nesta primeira entrega, Trilitarate conversará coa artista portuguesa Joana Barra Vaz sobre a relación da música e as técnicas audiovisuais.