A caravana da comedia en Galicia desembarca esta semana en Rianxo, cun novo episodio de 'Malo será!'. O arousán Carlos Blanco acompañará o elenco habitual do programa e a actriz novel Pamela Miguéns representará o talento local. Non faltarán os personaxes máis queridos polo público, como Chiruca ou o Dúo Sol e Sombra.

Atracos surrealistas cun negociador moi particular ou a historia dun tuno especialista en roubar corazóns completarán este novo capítulo do programa conducido por Lucía Regueiro.