O programa “Sopa de Festa” levará esta noite a audiencia da TVG ata un dos maiores escaparates dos produtos das rías galegas: a Festa do Marisco do Grove. A vila mariñeira leva celebrando este evento gastrónomico desde hai 51 edicións, sendo unha das pioneiras no turismo gastronómico e onde, ademais da festa, prima tamén a variedade de activades.

Co obxectivo de amosarlles aos espectadores todos estes festexos e, sobre todo, os bos e saborosos produtos que se extraen do mar de Arousa, o equipo de “Sopa de Festa” pasou toda unha xornada cos veciños e cos moitos visitantes que acoden para degustar unhas boas nécoras, camaróns, ameixas, percebes, mexillóns... Unha morea de produtos nas súas máis amplas variedades. 

Coma sempre, ademais da degustación do produto, as cámaras do espazo da TVG acompañaron os organizadores e cociñeiros da vila que, durante os dez días de festa, se preocupan de que todo estea perfecto para que os visitantes poidan gozar tanto do bo comer coma do bo ambiente. 

A receita da semana virá nesta ocasión da man dun dos grandes da cociña galega, Javier Olleros, que proporá desde o seu restaurante Culler de Pau un xeito distinto e máis elaborado de comer algunha das variedades de marisco das nosas rías. Ao longo desta emisión, os espectadores tamén descubrirán as belezas turísticas da zona.