“ZigZag Diario” entrevista hoxe no estudio ao director Álex Sampayo, que  chega ao programa para presentar a obra de teatro “Amor flexible”, unha comedia de actualidade, próxima e amable, que profundiza nas relacións familiares e de parella. Este traballo  da compañía Redrum Teatro estrearase o próximo día 27 de febreiro no teatro Rosalía da Coruña.  

Este espazo da Galega presentado por Pilar G. Rego tamén se achegará ata a rodaxe da última produción de Vaca Films “Welcome to Harmony”, un filme de horror postapocalíptico dirixido por Miguel Ángel Vivas e baseada no superventas de Juan de Dios Garduño titulado “Y pese a todo”. Os espectadores tamén poderán coñecer como se está a rodar “A esmorga”, a tan esperada longametraxe de Ignacio Vilar.