“Sopa de Festa” goza esta vez da Festa  do Galo de Curral de Vila de Cruces, un evento que leva 24 anos exaltando o seu máis prezado e famoso produto e que está declarado de Interese Turístico.

A xornada estivo marcada sobre todo pola degustación do galo de curral nos distintos establecementos hostaleiros da vila. As cámaras do programa lévannos ata un restaurante que nos amosa a receita máis tradicional deste manxar.

A presentadora, Paula Señarís, conversa cun criador de galo de curral, que revela o segredo para que a carne desta ave sexa tan saborosa e prezada polos cociñeiros.

Na festa, que tivo como pregoeiro o actor Xosé Antonio Touriñán, colaborador do Land Róber Tunai Show, actuaron os Golden Apple Quartet, Si Son Ghaiteiros e Voces de Terra.