Vaia troula
Feira Medieval das Pontes / Romaría da Saínza
O espazo “Vaia Troula”, co que os espectadores da TVG están a gozar das numerosas festas que se viven cada semana en Galicia, conducirá esta edición a súa presentadora, Nieves Rodríguez, cara ás Pontes de García Rodríguez, onde celebran nestes días a súa Feira Medieval.
Como é costume, as reporteiras do programa, Alicia Lombán, Paula Señarís e Olaya Rivas, saudarán tamén os seguidores de “Vaia Troula” desde cadansúa celebración. En Rairiz de Veiga, Alicia Lombán será partícipe das festas da Nosa Señora da Mercé e da Romaría da Saínza, toda unha tradición secular, que se remonta ao 1840, á batalla entre as tropas mouras e as cristiás. A reporteira tamén se desprazará ata Celanova para vivir a procesión nocturna da Ramallosa, moi coñecida e vistosa, xa que centos de persoas van detrás das charangas con faroliños de papel de cores alumeados con candeas, cantando e bailando.
Olaya Rivas dará a coñecer desde O Porriño as festas do Cristo da Agonía e, desde A Cañiza, a Romaría da Pena de Francia.
A reporteira Paula Señarís acudirá nesta edición ata Viveiro, onde festexan o Curro de Candaoso. A festa de Santa Marta de Ponte Arnelas, en Vilanova de Arousa, completa as propostas do “Vaia Troula” desta semana.
A música correrá a cargo das orquestras Ráfaga e Los Satélites.