Para comezar as reporteiras do programa están con Xurxo Rivas, un experto en viños da Coruña, que fará un breve repaso polas cinco D.O. que hai en Galicia. E despois saíran pola zona vella da cidade herculina para gozar do ambiente dos viños.

O percorrido do programa do mércores á noite continuará en Ribadavia onde, despois de dous anos, volven celebrar a súa prestixiosa Feira do Viño do Ribeiro. A continuación as reporteiras estarán na zona das Rías Baixas para descubrir todos os segredos da uva con máis sona de Galicia: o Albariño.

Despois viaxarán á comarca de Monterrei para gozar do sabor dos viños da zona e comer unha tapiña de polbo na feira de Verín. E haberá máis, porque as cámaras de "Eu quero viño" tamén farán parada na Rúa e no Barco de Valdeorras. Alí coñeceremos en profundidade os viños de Valdeorras e tamén bailaremos ao son da banda de gaitas Abertal. A espectacular Ribeira Sacra, famosa polas súas paisaxes e os viños elaborados con uva mencía, será outro dos lugares que visitarán as reporteiras do programa.