Neste segundo programa o equipo de cociñeiros de Come a Comarca visita a comarca de Deza para coñecer os segredos da súa gastronomía e aprender a facer o menú máis tradicional da comarca, composto por: empanada de liscos, mini-hamburguesas de cocido e rosquillas.

Alejandro Iglesias, xefe do restaurante Cabanas, será o encargado de guiar aos concursantes pola gastronomía de Deza. Para aprender a preparar estes pratos, os cociñeiros afeccionados irán a Embutidos La Lalinense, en Lalín, a aprender a facer un cocido reinventado en hamburguesa.

En Prado, Lalín, visitarán o Muíño de Cuíña e aprenderán a facer as mellores empanadas do mundo con Carme Pillado e Lola Sangiao, dúas senlleiras gañadoras da Empanada de Bandeira. Por último, visitarán os veciños de Abades, en Silleda, para que lles ensinen a amasar e dar forma á sobremesa máis característica da comarca, a rosquilla.

Unha vez desvelados os segredos das tres receitas, os cinco cociñeiros afeccionados do programa enfrontaranse nun concurso popular, na Praza da Igrexa de Lalín, aos mellores cociñeiros da comarca facendo eses pratos: Alberto González e Esperanza Taboada do Bodegón Currás (Lalín), as irmás Cristina e Cecilia Sanmartín, de Casa San Martín (O Corpiño, Lalín) e José Marcelino Varela da Confitería Tábora (Silleda).