Novos horizontes, pero ao mesmo tempo novas preocupacións caen sobre a familia máis poderosa da Sardiñeira, os Matalobos, que ven como se debilita a súa forza interna. A tráxica morte do fillo de Carmelo, Iván, provoca a ruptura de todo tipo de tratos entre este e a xefa do clan colombiano, Adriana. O clan dos Matalobos está illado e necesita de novos provedores para poder saír adiante, se ben Carmelo pensa que antes de abrir novas vías de negocio hai que afianzar a posición da familia, que ve como se rompen os seus vínculos e vai ser a matriarca, dona Carme, quen saiba como restablecer a orde, actuando con dureza e castigando os traidores.

Ademais, Santiago Táboas é un home marcado en toda a Sardiñeira, que sabe que o tenente é o autor do disparo que terminou coa vida de Iván Matalobos, o que o fai estar no punto de mira dos mafiosos; pero non soamente existe esta ameaza, senón que dentro da propia fiscalía hai quen quere anotarse un tanto para acabar coa carreira do axente da Benemérita e a investigación interna podería materializarse nunha acusación de homicidio imprudente...