“ZigZag Diario” ofrecerá hoxe unha entrevista con Brais Romero para falar do galego no cinema galego. Este novísimo do noso audiovisual é o gañador da primeira edición do Premio María Luz Morales ao mellor ensaio audiovisual. Os premios, concedidos pola Academia Galega do Audiovisual, levan o nome dunha xornalista coruñesa que foi a primeira directora dun xornal diario estatal e que exerceu como crítica, investigadora e colaboradora de producións audiovisuais.
Por outro lado, a través de senllas reportaxes, o programa lembrará os dous festivais cinematográficos máis persoais de Galicia: o Festival de Cans, certame de curtametraxes de produción galega, con cinema combativo e social; e a Mostra Internacional de Cinema Periférico S8, unha reflexión sobre a arte do cinema, cun concepto único no panorama do noso país.