Unha realizadora de documental entra nun mundo pouco frecuentado por occidentais: a Amazonía peruana. Segue os pasos dun atípico aventureiro, natural de Vigo e empresario cárnico retirado, chamado Antonio Abreu. Eles son "Apash", na lingua indíxena: "os que veñen de fóra". Antonio Abreu vén realizar tres traballos: entregar a doazón da Fundación do Fútbol Barcelona, unhas camisetas para nenos de comunidades awajún; reencontrarse co seu amigo indíxena Alfonso Graña, posible fillo dun emigrante galego glorificado no seu día como "rei dos xíbaros"; e pedir aos seus amigos de Pluspetrol Perú que colaboren, no canto de obstaculizar, no desenvolvemento das comunidades amazónicas.