A TVG dará cobertura este verán á xira 2017 das grandes orquestras galegas cun amplo dispositivo que levará ás casas dos espectadores da TVG os novos e impresionantes espectáculos deste ano.

Cada xoves, en horario de máxima audiencia, coñeceranse de primeira man as coreografías imposibles, as novas fichaxes e as cancións que dominarán a escena musical da temporada estival.

Non moverse do sofá será complicado coas vibrantes actuacións de formacións como a orquestra Panorama, a París de Noia, o Combo Dominicano, Los Satélites ou a Olympus, que amosarán por toda a xeografía o repertorio que resoará en cada campo da festa, cada praza ou cada pavillón das vilas e cidades de Galicia.

Nove cámaras e dous reporteiros aseguraranse de captar os momentos máis emocionantes, espectaculares e divertidos, sen esquecer a paixón dos afeccionados ás orquestras, os bailes agarrados e os segundos pases, só aptos para os máis atrevidos.