Na súa primeira edición, o programa estará dedicado ao aspecto físico e aos adobíos. Hai bandas ben definidas se de roupa, enfeites e indumentarias se trata, nesa estratexia de adobío e representación que é a vida propia. Todos se preocupan polo aspecto, pero desde ópticas ben diferentes, mesmo enfrontadas. 

Por “Doutra Banda” desfilarán hoxe galegos que aman ou desprezan a moda, seres de boutique careira e de posto na rúa, cidadáns de mono azul ou de gravata de seda, estilismo de altura ou arranxos de aldea e peiteados sinxelos fronte á indumentaria que mimetiza os heroes do manga xaponés ou procura maquillaxes vampíricas porque, como se di na consulta desta semana de “O Diván”, “antes coxa que corrente”.