En Zona mixta falaron de surf en ondas xigantes con Óscar García. A tormenta perfecta para eles chegaba logo de moitos meses coa borrasca Épsilon, pero non puido celebrarse o campionato que tanto lles custara organizar.

Comezaba falando de se hai que ter algo especial para gustar disto: "Non creo que sexamos tolos, máis tolo está un que colle o coche sen ter descansado dabondo. Unha borrasca como a Epsilon é perfecta para o surf e as grandes ondas. Gústanos medirnos fronte as ondas no mar. Levamos traballando todo o ano para isto, e xa en febreiro falamos de adiar o Campionato. Xa vendo o que pasaba por China sospeitabamos que algo ía pasar. Xusto agora que temos a tormenta perfecta para isto... mira o que está a pasar en toda España. Dáche unha carraxe terrible volver ter que suspendelo. Perdemos patrocinadores".

E ademais todo isto ten consecuencias de perdas monetarias non só para eles, que o levan preparando e poñendo moito da súa parte: "Non falamos só de perdas económicas para nós, senón para toda a Mariña. Calcúlase que o ano pasado houbo un retorno duns 5 millóns de euros, todo isto voou polo aire. Os surfistas que ían estar en Ribadeo están hoxe en Nazaré, e hai milleiros de persoas. Alí están todos gozando e aquí non se pode celebrar?".

A mágoa é maior cando el mesmo sae ao mar e ve como está a situación perfecta para surfear estas ondas xigantes: "Estes días a costa de Lugo está a rebentar de ondas. Onte, na praia de Covas (Viveiro), que está nunha ría, había 20 surfistas só alí. En Nazaré as ondas que están a coller hoxe poden estar preto do récord mundial, que está en 31 metros. O que non teña medo, non debe ir ao mar, iso está claro".