Fran González Pérez pasou hoxe pola Zona mixta da Radio Galega para falarnos do acontecido na última xornada da Liga de Segunda División e todo o que supuxo.

Comezou moi contundente na súa valoración do sucedido e de como se están a suceder os feitos: "Foi un atropelo e non houbo limpeza nesta última xornada. Isto non pode quedar así. Como non se vai xogar co resultado? Se o Dépor gaña 2-0 ou 3-0 no descanso a presión sería enorme para os demais. Por non falar do penalti en Albacete, que vamos, agora parece que é punible coa nova norma, pero en fin...".

Sobre o que pode acontecer co descenso ten dúbidas: "Non sei que pode pasar, o máis xusto sería a liga de 24, pero tamén temos o problema do play-off se se decide isto".

A nivel persoal, non desbota unha volta ao seu club: "Un proxecto en Abegondo comigo se se descende á 2ªB? Eu xa dixen hai tempo que estaría encantado de poder vir axudar. Pola miña parte non habería problema. Véxome moi capacitado para botar unha man no que necesite o Dépor. Non é cuestión de traballar sen cobrar, pero non vou poñer problemas de cartos nestes momentos tan difíciles".

Congratulouse do movemento que está notar a prol dentro e fóra do Dépor: "Alégrame ver a unión no deportivismo, que xa era hora. Pero tamén fóra de Galicia noto apoio. Botei de menos a unión de todos os equipos para parar todos os partidos. Hoxe pasa aquí, pero mañá tócalle a outro. Deberían estar todos máis unidos".

E rematou falándonos da xenética, do seu fillo que xoga nas categorías inferiores do F. C. Barcelona: "Teño un ollo no Barça B para o ascenso, o rapaz non xoga moito, pero estou seguro de que se non se ascende este ano, será o seguinte".