Patxi Villanueva pasou por Zona mixta para nos falar do que vai ser porteiro de referencia no Celta que queda de Liga diante das lesións de Rubén e Sergio. Amosou total confianza nel: "Iván Villar está perfectamente preparado para xogar en Primeira. É un porteiro moi solvente, moi tranquilo, moi bo cos pés...".

E tamén incidiu non só no porteiro e o seu futuro, senón nos que veñen xa empurrando con forza detrás del: "O Celta non vai ter problemas para se salvar, aínda que no fútbol nunca se pode dicir. Polo que eu coñezo a Iván Villar non é un caso único. A canteira celeste de porteiros é fantástica. Iago en xuvenís tamén é moi bo e aínda que lle toque, vai cumprir". Para un porteiro, despois de tanto tempo sen xogar como Iván non é o mesmo que os xogadores de campo. E tampouco é o mesmo adestrar que xogar. Pero xa vistes o outro día. Saíu en frío e fixo unha parada moi boa. Nestes tres partidos difíciles vai demostrar que vale".