CRTVG

Buscar

Galicia por Diante

Pactos, tempo de máximos

29/05/2019 - 08:08 h

Ai, benquerido director! Quédanos moito por tecer e destecer! Se alguén pensaba que isto dos pactos era chegar e encher, non lembra o complexo que é poñer de acordo rivais, tanto políticos como económicos. Cando se empeza unha negociación, o que presentan as partes son programas de máximos. Despois, a medida que se vai falando, as mesmas partes fan o que din os labregos: ir ao rego. Agora estamos no intre dos máximos.

O que fixo onte o comité negociador de Ciudadanos lembra moito aquel berro de maio do 68: sé realista, pide o imposible. E imposible é que os candidatos socialistas reneguen da política territorial do seu líder e se apunten á política territorial do adversario Rivera. Pode haber algunha excepción dos que sempre foron críticos con Sánchez, como é o caso de Lambán en Aragón,pero non ata o punto de rebelarse contra o propio partido e condenarse a ser expulsados do paraíso socialista. E é moito máis complicado aínda que se apunten á aplicación do 155 se non hai razóns xurídicas ou delituosas para facelo. Todo isto é un choque frontal imposible de aceptar polos socialistas. Ao mellor un Fernández Vara en Estremadura ou un García Page en Castela-A Mancha están intimamente máis cerca de Rivera que de Sánchez na cuestión catalá, pero non o poden dicir, porque provocarían un cisma. Co cal, unha de dúas: ou Ciudadanos pon esas condicións por se acaso alguén pica ou estase cargando de razón para xustificar a alianza co Partido Popular. Xa veremos.

Distinto é o caso de Podemos e a súa aspiración a entrar no Goberno. Segundo declarou Iglesias á axencia Efe, é un asunto que falou con Sánchez, Sánchez debeulle dicir que cabía esa posibilidade, e Iglesias confundiu os desexos coa realidade e viuse nun coche oficial ante a porta de Galapagar. Pero chegaron as eleccións do domingo, e Deus, que dicía Tierno Galván que nunca abandona o bo marxista, púxose de parte de Sánchez, quitoulle votos a Unidas Podemos e deulle ao presidente argumentos para desdicirse e non abrir a Iglesias as portas do Consello de Ministros. Moito ten que argumentar Iglesias agora para convencer a Sánchez e que o faga ministro. E Iglesias vai perder ademais outra guerra: a guerra da imaxe, porque a caricatura vai facer que quede como un home que quere tocar poder e poltrona coa desculpa de forzar políticas de esquerdas.

Así están as cousas a mércores. Pero isto non fixo máis que empezar e nin sequera coñecemos xuntanzas das partes para empezaren a falar. O bo que ten o panorama é a limitación de tempo. Caia do lado que caia cada acordo ou desacordo, todo ten que estar pechado antes do 15 de xuño, Valiñas.

As claves informativas do día, con especial atención á actualidade de Galicia