CRTVG

Buscar

Galicia por Diante Fin de Semana

Empresarios de Ferrolterra: "Tivemos moitas experiencias de plans de desenvolvemento e non dan resultados"

28/12/2019 - 08:07 h

O presidente da Asociación de Empresarios de Ferrolterra, Cristóbal Dobarro, esixe na Radio Galega concreción nos plans alternativos que compromete Endesa ante o peche da súa térmica das Pontes.  Nunha entrevista no Galicia por Diante, Dobarro lembrou a dependencia socioeconómica da bisbarra de decisións políticas que durante "décadas" afectaron  o sector da "enerxía" e a "construción naval". Por iso, na súa opinión, "temos que reivindicar fondamente que haxa alternativas, e xa digo, alternativas concretas".

Segundo argumentou, "xa tivemos experiencias de plans de desenvolvemento, plans alternativos e eses plans non dan resultados. Ten que haber iniciativas concretas, motrices, estruturais que sexan as que conleven poder retomar a actividade na comarca". 

Cristóbal Dobarro atribúe a decisión de Endesa aos propios intereses da eléctrica e a "decisións políticas de por medio". Segundo indicou, "entre todas estas decisións e intereses contrapostos, están todos os cidadáns das comarcas de Ferrol, Eume e Ortegal que ven padecer unha vez máis a súa economía por mor de decisións políticas que se toman de xeito vertical dende arriba, sen o debido diálogo, e sen a consideración que -pensamos- deben ter todos os cidadáns e empresarios afectados".