O xefe do Estado Maior da Garda Civil, o xeneral José Manuel Santiago, reiterou este martes que os efectivos que monitorizan as redes sociais tratan de identificar noticias falsas e desinformacións "de orixe incerta" que poidan xerar desconfianza e alarma na poboación e non unha crítica política.

"Isto é un asunto moi serio que non só afecta a España, tamén o resto de países do mundo", comezou o xeneral Santiago para responder, na conferencia de prensa posterior ao comité de seguimento da pandemia, a catro preguntas de diferentes medios de comunicación sobre as súas palabras do domingo e a instrución dada ás comandancias sobre a investigación de noticias falsas.

Nun dos apartados desta instrución remitida hai unha semana, o xefe do Estado Maior da Garda Civil solicita ás comandancias que avalíen semanalmente as actuacións de ciberseguridade vinculadas á COVID-19, entre elas campañas de desinformación ou noticias falsas susceptibles de xerar "desafección a institucións do Goberno".

"Cando se fala de institucións, fálase de institucións do ámbito local, autonómico e estatal (...) E falamos de noticias falsas e desinformación de carácter incerto con ánimo de xerar desconfianza e alarma, non de crítica política ou de cidadáns que falan con liberdade de expresión", precisou o xeneral.

Na súa resposta precisou que cando el se referiu a noticias falsas e desinformación falaba "dunha monitorización das redes cun escrúpulo dereito da liberdade de información de expresión e crítica. A Garda Civil é garante dos dereitos fundamentais, en que se atopa a liberdade de expresión e de información".

Respecto á instrución, o xeneral lembrou que se trata dun documento "de carácter interno" en que as unidades da Garda Civil de todo o territorio deben dar conta das actividades que se realizan no ámbito cibernético, desde fraudes ou estafas a investigacións xudiciais.

O Goberno di que non é aceptable que haxa mensaxes negativas e falsas que afecten a saúde dos cidadáns.

Dende o Partido Popular din que a misión do Goberno non é perseguir o debate e pídelle explicacións minuciosas ao ministro Marlaska. As asociacións de gardas civís son críticas.

Coa poboación confinada, as redes cobran aínda mais protagonismo. Os expertos din que o obxectivo dos perfís falsos como os que gababan as accións do Goberno é dirixir a opinión.

O Ministerio de Sanidade asegura que está sendo vítima dunha actividade fraudulenta e Facebook xa abriu unha investigación .