A súa apertura oficial ao público non será ata mañá, pero o Centro Estación Vialia de Vigo organizou este mércores unha preestrea ante un milleiro de invitados que xa puideron admirar sen intermediarios nin estadas as tripas do vangardista complexo deseñado polo arquitecto estadounidense Thom Mayne, chamado a ocupar un lugar central no skyline da cidade de Vigo.

Se é certo que hai actuacións destinadas a alterar radicalmente non só a fisionomía das cidades que as albergan, senón tamén os usos e costumes das xentes que as habitan, o Centro Vialia parece estar ideado para ser unha delas, ou polo menos esa é a intención.

"Hai momentos que marcan a historia dunha cidade, e este é un de eles", dixo exultante o alcalde de Vigo Abel Caballero, quen confesou que hoxe viviu un dos días máis importantes da súa vida e o máis importante da súa carreira política grazas á inauguración "desta xenialidade de Thom Mayne que vai dar a volta ao mundo".

O habitual entusiasmo do alcalde de Vigo, que comparou o centro estación Vialia con estacións de tren como a de Atocha ou Londres, foi secundado polo resto dos oradores. Entre eles a secretaria de Estado de transportes, mobilidade e axenda urbana Isabel Pardo de Vera, que cualificou o Centro de Vialia de "proxecto enorme" cun "enorme poder de rexeneración urbana" que converterá a Vigo nun referente de mobilidade a escala nacional e internacional. "Cústame pensar nun prólogo mellor para a inminente chegada da alta velocidade a Vigo", dixo, para asegurar que o AVE é unha "débeda histórica" coa cidade de Vigo. Segundo a secretaria, o Centro Estación Vialia é un exemplo do tipo de mobilidade ao que aspira o Goberno: segura, sostible e conectada, capaz de atopar un equilibrio entre os distintos modos de transporte e de poñer aos cidadáns no centro de todas as actuacións.

Pola súa banda, a conselleira de Infraestruturas e Mobilidade da Xunta de Galicia Ethel Vázquez destacou "o entendemento entre administracións" para facer posible o Centro Estación Vialia, "unha mostra de colaboración" e "un fito" que significará un antes e un despois para a cidade de Vigo.

EFE

O Centro Vialia Estación de Vigo é un proxecto concibido nun espazo de máis de 120.000 metros cadrados que integra unha ambiciosa proposta lúdica cunha moderna estación de tren e unha estación Intermodal de autobuses, a cal, coas súas 30 dársenas, acollerá ao redor de dous millóns de pasaxeiros ao ano e unhas 500 expedicións de autobús ao día, todo o cal cambiará a forma de desprazarse dos vigueses. 

No macrocomplexo de case 170 millóns de euros participan ADIF, a Xunta de Galicia, o Concello de Vigo e a empresa Nhood España, encargada de levantar o centro comercial a cambio dunha concesión de 50 anos, de modo que na estrea de hoxe estiveron representantes de todos eles, ademais dun innumerable ramallete de personalidades locais e autonómicas ou do presidente de Renfe, Isaías Táboas.

A estación de tren, cun custo de 44 millóns saídos das arcas de ADIF, foi inaugurada o pasado mes de marzo; o centro comercial que se inaugura hoxe custou uns 85 millóns; a estación Intermodal de autobuses, que se inaugurará en decembro, supuxo 18 millóns que pon a Xunta, e a todo iso hai que unir 21,4 millóns para pagar os accesos á autoestrada AP-9 que custean ADIF, Xunta de Galicia e Concello de Vigo e que estarán listos no primeiro trimestre de 2022.

No centro comercial estarán máis de 120 marcas, entre elas Primark, Fnac, KFC, ou Taco Bell, por citar só algunhas das que abren ao público mañá o seu primeiro establecemento en Vigo. As cifras que rodean o Centro Vialia son todas elas superlativas: unha gran praza pública de 30.000 metros cadrados con impresionantes vistas ao mar, un aparcamento público con 1.600 prazas, unha xeración de polo menos 1.500 empregos directos e uns 500 indirectos e unhas expectativas de atraer uns dez millóns de visitantes.