En boa parte de Europa medra a preocupación polas repuntas de coronavirus. No Reino Unido soben os ingresos; e volveron as restricións duras a países como Bulgaria, que volve estar en taxas de alto risco, ou Romanía, que impón desde hoxe o toque de queda nocturno.

En Bélxica están reunidos os expertos para dar marcha atrás no alivio das restricións. A cuarta vaga ameaza todo o país con máis 4.000 contaxios diarios, e por iso o Goberno toma medidas de urxencia. A primeira é a obrigatoriedade do uso da máscara en calquera establecemento. Ademais vaise solicitar test negativo de covid ou certificado de vacinación para acceder a calquera evento que se celebre en interiores con máis de cincuenta persoas. 

Esta situación estase a estender por todo o continente. En Romanía, coas peores taxas de vacinación, esta noite impoñen o toque de recollida e a obrigatoriedade da máscara. Bulgaria xa o fixo. E é que ademais están solicitando axuda aos seus socios comunitarios para que lles subministren respiradores e material médico. Pero é que ademais, por exemplo, na gran potencia continental, Alemaña, estanse vendo taxas de contaxio que non se vían desde o mes de maio.