O Reino Unido acode ás urnas a vindeira semana e o partido xógase entre o primeiro ministro Boris Johnson e o líder dos laboristas, Jeremy Corbyn.

"Teño 50 anos e é o peor que vin na miña vida sobre o estado da política. Todos eles son uns mentireiros", di este cidadán.

Esta muller asegura que non adoita votar conservador e que non confía particularmente en Boris Johnson, pero que si lle vai votar esta vez: "Quero saír da UE e é o único que nos vai sacar", asegura.

O xornal The Sunday Times publicou este domingo unha enquisa en que dá como claro gañador a Johnson, e serao, segundo eses resultados, con maioría absoluta.

A sondaxe indica que os tories obterán o 43% dos votos, dez puntos porcentuais máis que o Partido Laborista. Iso traduciríase en que os conservadores regresarían ao Parlamento de Westminster con 344 dos 650 escanos en xogo, 27 máis que na lexislatura anterior e os laboristas acadarían 221 escanos, con 41 menos.

En caso de que se cumpran os prognósticos, a vitoria de Johnson sería a máis ampla desde a do laborista Tony Blair en 2005.

Por detrás das grandes formacións británicas situaríanse o Partido Nacionalista Escocés, con 47 deputados, 12 máis, e o Liberal Demócrata quedaría con 14, co que subiría dous.

Durante a campaña, Corbyn defendeu renegociar coa UE un novo acordo, para despois sometelo a outro referendo. Johnson cre que hai que pasar páxina e levar a cabo o brexit a toda costa o 31 de xaneiro.

Pero ademais do tema do brexit, a inmigración volveu cobrar protagonismo este domingo. Nunha entrevista, Johnson deu detalles dos seus plans para evitar que os traballadores estranxeiros "non cualificados" poidan establecerse permanentemente no Reino Unido.