Unha enfermeira de 52 anos do Servizo Vasco de Saúde faleceu hoxe con coronavirus, segundo informou o lehendakari Iñigo Urkullo na súa comparecencia para facilitar os últimos datos da pandemia en Euskadi.

É a primeira morte que se rexistra entre o persoal sanitario español a causa desta enfermidade.

A enfermeira estaba ingresada nun hospital de Biscaia desde hai seis días. O total de mortos con coronavirus en Euskadi xa acada as 53 persoas. Hai 1.190 casos positivos nesa comunidade, unha das máis afectadas e cos datos de incremento de contaxios máis alto de España.

"Esta crise está tendo un custo humano altísimo para toda a sociedade", dixo Urkullu, que transmitiu o seu pésame á familia e achegados da enfermeira e gabou os "miles de profesionais que todos os días están traballando en primeira liña dando o mellor de si para protexernos a todos".