A cidade de Nova York elixiu unha enfermeira da comunidade afroamericana, unha das máis castigadas pola pandemia, e o barrio de Queens, unha das áreas onde a covid-19 roubou máis vidas no país, para comezar a súa campaña de vacinación neste estado, que segue sendo o que máis defuncións rexistrou debido ao coronavirus.
A enfermeira de coidados intensivos Sandra Lindsey, que traballa no hospital Jewish Medical Center, recibiu a primeira dose da vacina á 9.23 hora local (14.23 GMT). "Espero que isto marque o principio do final dun tempo moi doloroso na nosa historia", dixo a sanitaria tras recibir a dose da vacina desenvolvida pola farmacéutica Pfizer e que foi aprobada pola Administración de Alimentos e Medicamentos (FDA, en inglés) de Estados Unidos o pasado venres.
Sentada nunha cadeira, xunto á doutora que lle inoculou a dose, tamén afroamericana, Lindsay quixo dar as grazas a todos os traballadores de primeira liña do mundo que como ela loitaron e seguen loitando contra a enfermidade, que en Nova York causou máis de 35.000 mortes, sobre todo durante a primeira onda da pandemia na pasada primavera. "Quero inculcar a confianza no público de que a vacina é segura", dixo a enfermeira, que insistiu en que ela cre na ciencia e en que o seu traballo "está guiado pola ciencia".