CRTVG

Buscar

Unha empregada dunha empresa en Portas atopa unha serpe na papeleira da oficina

Publicado o 04/07/2019 15:34

Aparece unha serpe dun metro na papeleira dunha oficina de Portas, en Pontevedra. Os voluntarios de Protección Civil identificárona e procederon á súa retirada. A pesar do susto que levou a empregada que a atopou, o réptil non supuña risco ningún para as persoas.

Montse dirixiuse ao seu posto de traballo como cada maña nun negocio de Portas. O que non imaxinaba era que a xornada pintaría diferente ao que está acostumada.

"Pois nada, como é habitual, traballando, vou a oficina e séntome na silla e vou tirar un papel que sobraba, vexo unha serpe toda entrelazada na papelera", di Montse.

Montse non é unha muller medoñenta, e a pesar diso o primeiro que fixo cando viu ao réptil, dun metro de lonxitude, foi saír correndo. "É superior a min. Lagartos, ratos... si. Pero as serpes son superiores a min", engade recordando o momento no que saíu correndo.

Cando se tranquilizou, tras falar co seu xefe, decidiu chamar a Protección Civil de Portas. Os voluntarios do corpo comprobaron que se trataba dunha serpe de auga que, en principio, non supuña un risco para as  persoas. Así, procederon a súa retirada.

"Chamei a Protección Civil e cando chegaron xa se encargaron dela. Cando entraron a culebra xa non estaba na papelera, tiveron que mover algún moble. Atopárona debaixo da torre da computadora, e nada, xa se encargaron eles de todo", conta Montse. 

Protección Civil entregou o ofidio no departamento de Medio Ambiente, encargados de devolver a serpe ao seu hábitat natural. Agora Montse, tras ese pequeno susto, relata o acontecido como unha boa anécdota que agarda, iso si, que non se repita.

Noticias web

04/07/2019