CRTVG

Buscar

Un neno falece afogado en Mazaricos durante unha excursión escolar

Publicado o 15/06/2021 21:33

Un neno do Colexio CEIP Fogar de Carballo faleceu esta mañá afogado no encoro da Fervenza, en Mazaricos, durante unha excursión escolar.

A vítima, de once anos, estaba nunha piragua xunta outros compañeiros, e foron autorizados a bañarse. Nun momento, perdeuse a visión do pequeno, e cando o rescataron estaba falecido.

Os rapaces, uns 40 alumnos, estaban acompañados na excursión na zona de Naturmaz, un parque de aventuras, polo director do centro, un coidador e un profesor.

Efectivos da Policía Xudicial da Garda Civil fixéronse cargo da investigación para aclarar o ocorrido, pero de momento descoñécense as circunstancias que rodean o incidente. 

A noticia impactou nos veciños do municipio de Carballo; o propio Goberno local difundiu un comunicado nas súas redes sociais para trasladar o seu apoio aos familiares do menor. 

"Consternados pola noticia, no nome de toda a corporación queremos facer chegar as condolencias e a solidariedade do pobo de Carballo á familia do neno, aínda sabendo que non hai consolo posible", lamentaron.

Educación decreta tres días de loito no CEIP Fogar de Carballo

A Consellería de Cultura, Educación e Universidade decretou tres días de loito oficial sen actividade lectiva no CEIP Fogar de Carballo. Educación fixo chegar a decisión aos pais a través dun comunicado e trasladou o seu máis sentido pésame en nome do Goberno galego aos seus familiares, profesores e compañeiros.

O propio conselleiro do ramo, Román Rodríguez, quixo manifestar o seu apoio a través da súa conta en redes sociais ante este tráxico suceso. "Galicia está conmocionada polo tráxico accidente ocorrido este mediodía en Mazaricos. Quero trasladar o meu máis sentido pésame á familia e seres queridos do neno e o total apoio á comunidade educativa. Descanse en paz", sinalou.

O departamento autonómico trasladou o seu apoio "especialmente" aos seus compañeiros e profesores do CEIP Fogar de Carballo, "sendo conscientes de que non existen palabras que minoren a terrible dor deste momento". Neste sentido, trasladaron a Europa Press que están en contacto coa dirección do centro para facilitar "todo o apoio que sexa necesario nunha situación como esta", do mesmo xeito que se puxeron a disposición das autoridades xudiciais que centralizan a investigación dos feitos.