Levan un mes sen Manuela Barbosa. A súa familia ademais da dor pola súa ausencia vese desesperada porque non hai pegada que oriente a investigación. Din que é como se a tragase a terra. Agora buscan estender fóra da provincia de Pontevedra a súa procura.

Ana e Raquel volven ao último punto onde se perdeu o sinal do móbil de súa nai, Manuela Barbosa Sousa. En Pontesampaio. Ía cara á a casa de Ana pero, nunca chegou a atoparse con ela. As pescudas sitúana pasando por diante desta sucursal bancaria no centro de Arcade o 13 de xullo, como recolleron as cámaras de seguridade ás tres menos cuarto da tarde.

"É como se a tragase a terra, en tanto tempo que levan eles traballando nestes casos, sempre teñen algún indicio, algunha pegada da que tirar. Pero no caso da miña nai a pista perdeuse aquí en Arcade, e non volveron ver en ningún outro sitio, é moi estraño realmente. Están a buscar Protección Civil e Garda Civil en casas e leiras abandonadas de Arcade e Soutomaior, pediron permiso aos donos para entrar por se ela se puido refuxiar nalgunha desas casas e está alí", asegura a súa filla Raquel. 

Seguen distribuíndo carteis coa súa foto ao cumprirse un mes da desaparición. Agora están a facelo en albergues do Camiño de Santiago. A familia cre a estas alturas que Manuela puido saír da provincia. Piden que se amplíe o ámbito de colaboración por todo o país e que calquera persoa que poida vela chame ao 062, ao 091 ou ao 112.  "Cremos que puido saír de Pontevedra porque a provincia está toda pegada de carteis e toda batida. Como ela levaba cartos o día da desaparición puido moverse a outra parte de Galicia, incluso non se desbota a posibilidade que se movera ao resto de España ou a Portugal."

O día da súa desaparición levaba un vestido amarelo escuro con estampado de lunares brancos, máscara negra e un bolso de palla redondo.