Un gran incendio declarado esta mañá nunha empresa de reciclaxe situada nun polígono de  Montornès (Barcelona), que foi desaloxada, levou a Protección Civil a activar o plan de emerxencias químicas e a aconsellarlles aos veciños próximos á zona que queden nas súas casas.

Segundo informa este mércores Protección Civil, o incendio, de grandes dimensións e que provocou unha gran columna de fume, iniciouse ás 7.41 horas e obrigou a activar o plan de emerxencia exterior do sector químico de Cataluña (PLASEQCAT).

Aínda que non hai persoas afectadas polo incendio, Protección Civil recoméndalles aos cidadáns que non se acheguen ao polígono industrial Can Bosquerons de Montornès e que os veciños se confinen nas súas casas se notan molestias polo fume, sobre todo, os que viven nos municipios máis próximos, como os de Montornès, Montmeló, Martorelles e Vilanova del Vallès.

No incendio, que se produciu na empresa de solucións ambientais Ditecsa Centre Derpin, están a traballar 22 dotacións terrestres dos Bombeiros da Generalitat.

O lume afectou a totalidade da nave desta empresa, que foi desaloxada.

Protección Civil lanzou unha serie de consellos aos veciños se notan molestias polo fume: que se refuxien no primeiro edificio que atopen se están na rúa, parar os sistemas de climatización, facer un seguimento da saúde de persoas maiores, nenos ou con problemas respiratorios, evitar acceder a subterráneos e partes baixas dos edificios ou estar ao tanto de posibles restricións no consumo da auga da billa.