Galicia está entre as tres comunidades autónomas con máis persoas vacinadas nestes momentos, aínda que as porcentaxes varían moito se nos referimos á poboación cuberta cunha dose ou con dúas. Asturias é a que ten máis xente coas vacinas postas.

Case a metade dos asturianos, susceptibles de se vacinar teñen posta polo menos unha dose. Galicia séguelle neste indicador cunha porcentaxe que supera por pouco o 47 por cento e Castela e León está no 46 por cento.

Son máis discretas as porcentaxes canto á poboación coa pauta completa. Asturias está en cabeza co 27 por cento da poboación diana vacinada. Galicia ocupa o terceiro lugar, cun pouco máis dun cuarto da poboación inmunizada por completo.

Con datos do venres a primeira hora son 603.500 os galegos que están nesta situación, e dado que o total da poboación por vacinar é de 2.362.643 persoas, representa un 25.54 por cento.