E esta madrugada o ceo galego iluminouse. Centos de persoas sorprendéronse ao ver unha imaxe no ceo. Un gran resplandor. Podería ser unha estrela fugaz, pero cando son de maior tamaño, coma esta, chámanse bólidos. Ao ser de maior dimensión provocan este efecto.

Unha pedra cósmica cruzou durante a madrugada deste luns o ceo de Galicia tras impactar na atmosfera terrestre, o que provocou unha explosión moi rechamante de luz, que varias testemuñas definiron como "bóla de lume" e que causou algunhas detonacións, que mesmo fixeron vibrar algunhas ventás.

Así o confirmou o director do Observatorio Astronómico Ramón María Aller da Universidade de Santiago de Compostela (USC), José Ángel Docobo, quen explicou que esta pedra cósmica é "un meteoroide que vira arredor do sol e que na súa traxectoria pode impactar na atmosfera dalgún planeta de interporse este en o seu camiño".

Estes meteoroides, que se forman a partir de restos de choques entre asteroides, cometas e outros elementos, poden, dependendo da súa masa, destruírse ao impactar coa atmosfera ou atravesala. Neste caso, a pedra cósmica, cuxo impacto na terra Docobo localizou "probablemente, na provincia de León", atravesou as capas atmosféricas máis superficiais e "ao chegar ás máis baixas, provocou unha explosión de luz e ruído que mesmo fixo vibrar xanelas", explicou o astrónomo galego.

A "bóla de lume de cor verde", como algunhas testemuñas describiron o fenómeno en redes sociais, puido avistarse de Lugo a Pontevedra e do Grove a Chantada, así como no Bierzo.

A Rede de Investigación Bólidos e Meteoritos (SPMN) confirmou que varias estacións da súa rede detectaron a presenza dun gran bólido sobre Galicia e Castela e León que tamén foi detectado na estación de Estepa-Sevilla, a 600 quilómetros de distancia.