O presidente estadounidense, Donald Trump, dixo este sábado que "as eleccións están lonxe de finalizar" e criticou que o candidato demócrata, Joe Biden, se "apresurase" a reclamar "falsamente" a vitoria nas eleccións presidenciais de 2020 nos EUA.

"Todos sabemos por que Joe Biden se apresurou falsamente a proclamarse gañador, e por que os seus aliados están a tratar de axudarlle con tanta insistencia: Non queren que se expoña a verdade. O feito básico é que estas eleccións están lonxe de finalizar", manifestou Trump nun comunicado emitido pola súa campaña.

Así mesmo tamén publicou na súa conta de Twitter que gañou as eleccións "por moito". O mandatario, que se atopa xogando ao golf no seu club de  Sterling (Virxinia), agregou que "Joe  Biden non foi certificado como gañador de ningún estado, e aínda menos nos estados en rifada disputa que se encamiñan a recontos obrigatorios, ou nos que a nosa campaña presentou demandas legais sobre a validez e legalidade que poderían determinar o vencedor final".

Igualmente, tamén avanzou que a partir do luns a súa campaña "comezará a defender o noso caso nos tribunais para asegurar que as leis electorais se cumpren totalmente e se proclama o auténtico gañador".